ऑनलाइन लोकमत
पिंपरी, दि. 20 - पंतप्रधान, मुख्यमंत्री, पालकमंत्री आणि पुण्याचे महापौर यांनी आपल्या वाहनावरील लाल दिवा काढण्याचा निर्णय घेतला आहे. मात्र, पिंपरी-चिंचवडचे महापौर नितीन काळजे यांना गाडीवरील दिवा काढण्याचा सोस काही आवरत नसल्याचे दिसून येत आहे.
पिंपरी-चिंचवड महापालिकेत भारतीय जनता पक्षाची सत्ता आल्यानंतर पक्षनेते एकनाथ पवार यांनी सर्वप्रथम महापालिकेचे वाहन वापरण्याचा निर्णय घेतला. त्यानंतर स्थायी समिती सभापती सीमा सावळे यांनी महापालिकेचे वाहन नाकारले. जनतेच्या पैशांची बचत व्हावी, यासाठी हा निर्णय घेतला असल्याचे सत्ताधाºयांनी सांगितले होते. तसेच पत्रकारांना स्थायी समितीच्या बैठकीस बसण्यास परवानगी देण्यात आली. मात्र, महापौरांनी शासकीयच वाहन वापरणार असल्याचे माध्यमांना सांगितले होते. दरम्यान जनता आणि सरकार यांच्यातील अंतर कमी व्हावे यासाठी बुधवारी पंतप्रधान नरेंद्र मोदी यांनी वाहनावरील लाल दिवा हटविला. त्यानंतर पुण्यात झालेल्या एका कार्यक्रमाच्या वेळी मुख्यमंत्री देवेंद्र फडणवीस, त्यानंतर पालकमंत्री गिरीश बापट यांनी लाल दिवा काढला. गुरूवारी पुण्याचे महापौर मुक्ता टिळक यांनीही आपल्या वाहनावरील दिवा काढला. याबाबत पिंपरी-चिंचवडचे महापौर कोणता निर्णय घेणार याबाबत उत्सुकता होती. मात्र, त्यांनी दिवा काढण्याबाबत उनुत्सुकता दर्शविली आहे. उलट लाल दिव्याचे समर्थने केले. नितीन काळजे म्हणाले, ‘‘महापौरांना विविध कार्यक्रमासाठी बाहेर फिरावे लागते. त्यामुळे दिवा आवश्यक आहे. याबाबत नेत्यांशी बोलून निर्णय घेतला जाईल.’’