Turmeric Glow Trend: हळद ट्रेंड फॉलो कराल तर भयंकर संकट ओढावून घ्याल; ज्योतिषांचा अनोखा दावा!

Turmeric Glow Trend Astrology: सध्या हळदीच्या(Haldi Water Trend) ट्रेंडचा रील सोशल मीडियावर धुमाकूळ घालत आहे, पण ज्योतिषी सांगतात या ट्रेंडमुळे मोठी आपत्ती ओढवण्याची शक्यता आहे. एवढेच नाही तर त्यांनी भूतबाधा होऊ शकते असेही म्हटले आहे.

सोशल मीडियाच्या काळात एखादी गोष्ट क्षणार्धात व्हायरल होणे कठीण नाही. एकामागोमाग येणारे, गाजणारे ट्रेंड हा त्याचाच एक भाग. सध्या हळदीचा ट्रेंड सुरु आहे. जो उठतो तो काचेच्या ग्लासमध्ये पाणी भरून त्यात चमचाभर हळद टाकत आहे. तो ग्लास मोबाईलच्या टॉर्च लाईट वर ठेवून खोलीत अंधार केल्याने ग्लासमध्ये टप्प्याटप्प्याने उतरणारी हळद एखाद्या जादूसारखी दिसते. लहान मुलांना त्याचे कुतूहल वाटणे स्वाभाविक आहे, पण मोठेही हा ट्रेंड इतक्या मोठ्या संख्येने फॉलो करत आहेत. ते पाहता 'भारतातली हळद अशीच संपणार बहुतेक' असे उपहासात्मक विनोदही येऊ लागले आहेत.

मात्र या ट्रेंडवर आक्षेप घेत एका ज्योतिषाने लोकांना सावध करत हा ट्रेंड ताबडतोब थांबवा असा इशारा दिला आहे. कारण हा ट्रेंड नसून ही एक 'मांत्रिक' क्रिया आहे. ज्यामुळे तुम्ही तुमच्यावर आणि तुमच्या घरावर संकट ओढावून घ्याल, असा इशारा दिला आहे.

ज्योतिषी अरुण कुमार व्यास सांगतात, 'हळदीचा हा ट्रेंड एक मांत्रिक प्रक्रिया आहे. मांत्रिक लोक भूत, प्रेत, आत्मे बोलावण्यासाठी या तंत्राचा उपयोग करतात. रात्रीच्या अंधारात हा ट्रेंड करून पाहिल्याने नकारात्मक शक्ती तुमच्याकडे आणि तुमच्या वास्तू कडे आकर्षित होऊ शकते. ज्याचे शारीरिक, मानसिक, आर्थिक नुकसान होऊ शकते. एवढेच नाही तर भूतबाधा होण्याचीही शक्यता टाळता येत नाही, असे ते म्हणतात.

कुंडलीवरदेखील परिणाम होण्याची शक्यता:

अशा पद्धतीने हळद पाण्यात टाकल्याने तुमच्या जन्मकुंडलीतील चंद्र आणि गुरु बळ कमी होऊ शकते. ज्यामुळे तुमच्या नशिबावर वाईट परिणाम होऊ शकतो. तुमची मानसिक स्थिती देखील बिघडू शकते. व्यास सांगतात, ही पूर्णपणे हानिकारक प्रक्रिया आहे, जी तुमच्या घरात आपत्ती आणू शकते. म्हणून, अशा गोष्टी टाळल्या पाहिजेत.

सदर माहिती व्हिडीओच्या आधारे दिलेली असून लोकमत सदर माहितीला पुष्टी देत नाही.