नवीन वर्षात गुंतवणुकीचा श्रीगणेशा! 'या' आहेत श्रीमंत करणाऱ्या टॉप ५ योजना; सुरक्षा आणि दमदार परतावा

Top 5 Investment Options : नवीन वर्षाची सुरुवात म्हणजे केवळ नवीन संकल्प नव्हे, तर आर्थिक नियोजनाची देखील एक मोठी संधी असते. २०२५ मध्ये सोन्या-चांदीने दिलेला विक्रमी परतावा आणि शेअर बाजारातील चढ-उतार पाहता, २०२६ मध्ये गुंतवणूक करताना 'स्मार्ट' निर्णय घेणे गरजेचे आहे. तुम्ही जर सुरक्षितता आणि चांगला परतावा शोधत असाल, तर नवीन वर्षासाठी खालील ५ योजना तुमच्या रडारवर असायला हव्यात.

ज्यांना गुंतवणुकीत अजिबात जोखीम नको आहे, त्यांच्यासाठी पीपीएफ (सार्वजनिक भविष्य निर्वाह निधी) हा आजही सर्वात विश्वासार्ह पर्याय आहे. यावर केंद्र सरकारची हमी असते, त्यामुळे तुमचे पैसे पूर्णपणे सुरक्षित राहतात. यामध्ये गुंतवलेल्या रकमेवर प्राप्तिकर कायदा ८०-सी अंतर्गत सवलत मिळते आणि मिळणारे व्याजही करमुक्त असते. दीर्घकालीन उद्दिष्टांसाठी हा एक 'मस्ट हॅव' पर्याय आहे.

शेअर बाजाराची भीती वाटत असेल, तर म्युच्युअल फंडमधील एसआयपी हा सर्वोत्तम मार्ग आहे. बाजारातील अस्थिरतेचा फायदा घेऊन रुपयाच्या सरासरी खर्चाचा लाभ मिळतो. दरमहा छोटी रक्कम गुंतवून तुम्ही दीर्घकाळात मोठी संपत्ती उभी करू शकता. शिस्तबद्ध गुंतवणुकीसाठी हा २०२६ मधील सर्वात लोकप्रिय पर्याय असेल.

बँक एफडीला पर्याय म्हणून राष्ट्रीय बचत प्रमाणपत्रकडे पाहिले जाते. पोस्ट ऑफिसद्वारे चालवल्या जाणाऱ्या या योजनेत बँक एफडीपेक्षा अनेकदा अधिक व्याजदर मिळतो. ५ वर्षांच्या लॉक-इन कालावधीसह येणारी ही योजना कर बचतीसाठीही उपयुक्त आहे.

पोस्ट ऑफिस मासिक उत्पन्न योजना : ज्यांना दरमहा ठराविक रकमेची गरज आहे, त्यांच्यासाठी ही वरदान आहे. एकदा मोठी रक्कम गुंतवली की, तुम्हाला दरमहा व्याजाच्या स्वरूपात निश्चित उत्पन्न मिळते. ज्येष्ठ नागरिक किंवा गृहिणींसाठी नियमित खर्चासाठी हा सर्वात सुरक्षित पर्याय आहे.

तुमची जोखीम घेण्याची क्षमता जास्त असेल, तर थेट शेअर बाजार किंवा मालमत्तामध्ये गुंतवणूक करणे फायदेशीर ठरेल. दर्जेदार कंपन्यांचे शेअर्स तुम्हाला महागाईपेक्षा जास्त परतावा देऊ शकतात. दीर्घकाळात जमिनीच्या किंवा घराच्या किमतीत होणारी वाढ ही तुमच्या गुंतवणुकीचे मूल्य अनेक पटींनी वाढवू शकते.

कोणतीही गुंतवणूक करण्यापूर्वी तुमचे वय, आर्थिक उद्दिष्टे आणि जोखीम घेण्याची क्षमता यांचा विचार नक्की करा. सर्व पैसे एकाच ठिकाणी न गुंतवता विविध योजनांमध्ये विभागून लावणे नेहमीच फायदेशीर ठरते. कोणत्याही प्रकारची गुंतवणूक करण्यासाठी तज्ज्ञांचा सल्ला अवश्य घ्या.