मुंबईकरांसाठी खुशखबर! आता वाहतूक कोंडीतून सुटका, मुंबईत धावणार वॉटर मेट्रो! किती असेल तिकीट?

Mumbai Water Metro : कोचीच्या यशानंतर, देशाची आर्थिक राजधानी मुंबईत वाहतूक व्यवस्था सुधारण्यासाठी लवकरच वॉटर मेट्रो सुरू होणार आहे. यामुळे मुंबईकरांचा प्रवास वेगवान आणि सोपा होईल.

मुंबईतील प्रचंड वाहतूक कोंडी टाळण्यासाठी वॉटर मेट्रो एक महत्त्वाचा आणि वेगळा वाहतूक पर्याय म्हणून विकसित केली जात आहे.

केरळ राज्यातील कोचीमध्ये वॉटर मेट्रो यशस्वीपणे सुरू झाल्यानंतर, आता मुंबईतही ती सुरू करण्याची तयारी अंतिम टप्प्यात आहे. कोची वॉटर मेट्रोच्या सल्लागारांनीच मुंबईसाठी प्रस्ताव सादर केला आहे.

मुंबई परिसरात एकूण २९ टर्मिनल (जेट्टी स्टेशन) बांधण्याचे आणि १० नवे मार्ग सुरू करण्याचे प्रस्तावित आहे. यात प्रवाशांसाठी आधुनिक सुविधा, नव्या बोटींची खरेदी आणि इतर आवश्यक सोयी असतील.

या महत्त्वाकांक्षी प्रकल्पासाठी अंदाजे २,५०० कोटी रुपयांचे बजेट अपेक्षित आहे. राज्याचे मत्स्यव्यवसाय आणि बंदरे मंत्री नितेश राणे यांनी महाराष्ट्र मेरीटाईम बोर्डाला (MMB) या प्रकल्पाचा संपूर्ण आराखडा तीन महिन्यांत सादर करण्याचे निर्देश दिले आहेत.

वॉटर मेट्रोचे तिकीट दर सामान्य लोकांना परवडणारे ठेवण्याची तयारी आहे. तसेच, हे मेट्रो टर्मिनल जमिनीवरील बस आणि लोकल ट्रेन स्टेशनशी जोडले जातील, ज्यामुळे प्रवाशांना सहजपणे एका वाहतूक साधनातून दुसऱ्यात बदलता येईल.

वांद्रे, वरळी, वर्सोवा, दक्षिण मुंबई आणि नवी मुंबईसारख्या अधिक प्रवासी असलेल्या आणि फायदेशीर मार्गांना प्राधान्य दिले जाईल. उत्तर मुंबई ते दक्षिण मुंबई आणि नवी मुंबई ते दक्षिण मुंबई प्रवास करण्यासाठी हा एक उत्तम पर्याय असेल.

कोची वॉटर मेट्रो दररोज ३४,००० प्रवाशांना घेऊन जाते, १० बेटांना जोडते आणि ७६ किमी अंतर कापते. तिथे एका वॉटर मेट्रोमध्ये १०० प्रवासी (५० बसून, ५० उभे राहून) प्रवास करू शकतात. मुंबईतही अशीच आधुनिक आणि कार्यक्षम सेवा अपेक्षित आहे.

या प्रकल्पामुळे मुंबईकरांचे जीवनमान सुधारण्यास आणि शहरातील वाहतूक समस्या सोडवण्यास मोठी मदत होईल, अशी अपेक्षा आहे.