टाटा समूहाची 'आकाशात' नवी झेप! एअरबससोबत बनवणार हेलिकॉप्टर; 'या' राज्याला मिळणार लाभ

Tata Advanced Systems Limited : मिठापासून ते आलिशान गाड्या आणि आता विमान सेवेपर्यंत, टाटाने प्रत्येक क्षेत्रात आपला ठसा उमटवला आहे. आणि आता, टाटा पुन्हा एकदा एका नव्या आणि महत्त्वाच्या क्षेत्रात पाऊल टाकत आहे.

टाटा ग्रुपची कंपनी टाटा ॲडव्हान्स्ड सिस्टम्स लिमिटेड (TASL) आता युरोपियन विमान वाहतूक कंपनी एअरबस (Airbus) सोबत मिळून भारतात हेलिकॉप्टर बनवणार आहे! या दोन्ही कंपन्या कर्नाटकातील कोलार जिल्ह्यात भारतीय हवाई दलासाठी (Indian Air Force) H125 हेलिकॉप्टरची अंतिम असेंब्ली लाइन उभारणार आहेत.

एका अहवालानुसार, हे भारतातील पहिले खासगी क्षेत्रातील हेलिकॉप्टर असेंब्ली युनिट असेल. या प्रकल्पामुळे 'मेक इन इंडिया' उपक्रमाला अधिक बळकटी मिळेल आणि एरोस्पेस उत्पादनात भारत स्वयंपूर्ण होण्याच्या दिशेने मोठे पाऊल उचलेल.

हे युनिट एअरबसचे सर्वाधिक विक्री होणारे नागरी श्रेणीतील H125 हेलिकॉप्टर तयार करेल. महत्त्वाचे म्हणजे, असा प्लांट उभारणारा भारत फ्रान्स, अमेरिका आणि ब्राझील नंतर जगातील चौथा देश ठरणार आहे.

सुरुवातीला या युनिटची वार्षिक उत्पादन क्षमता १० हेलिकॉप्टरची असेल, पण येत्या काळात त्यात वाढ केली जाईल. एअरबसने पुढील २० वर्षांत भारत आणि दक्षिण आशियामध्ये ५०० हलक्या हेलिकॉप्टरची मागणी असेल असा अंदाज व्यक्त केला आहे.

हा प्लांट बेंगळुरूपासून सुमारे दोन तासांच्या अंतरावर असलेल्या वेमगल औद्योगिक क्षेत्रात उभारला जाईल. याच ठिकाणी टीएएसएलचे (TASL) इतर युनिट्सही कार्यरत आहेत. टाटाने नुकतीच वेमगल औद्योगिक क्षेत्रात ७.४ लाख चौरस फुटांची जागा घेतली आहे, जिथे विमान निर्मिती, अंतिम असेंब्ली आणि एमआरओ (MRO - Maintenance, Repair, and Overhaul) सुविधा देखील स्थापन केल्या जातील.

या प्रकल्पामुळे देशातील स्वदेशी उत्पादन मजबूत होईल, तसेच पुरवठा साखळीत गुंतवणूक वाढेल आणि नवीन रोजगाराच्या संधी देखील निर्माण होतील, असे एक्व्स (Aequs) चे अध्यक्ष आणि सीईओ अरविंद मोलिगेरी यांनी सांगितले.

यापूर्वीही टाटा आणि एअरबसने वडोदरा, गुजरात येथे मोठे गुंतवणूक प्रकल्प आणले आहेत, ज्यात सेमीकंडक्टर प्लांट आणि C295 विमान निर्मितीचा समावेश आहे. एकूणच, हा प्रकल्प भारतीय एरोस्पेस उद्योगासाठी एक मैलाचा दगड ठरणार आहे आणि भारताची संरक्षण क्षेत्रातील आत्मनिर्भरता वाढवण्यास मदत करेल.