परभणी : जिल्ह्यात गोवर-रुबेलाचे ९५ टक्के लसीकरण पूर्ण झाले असले तरी बालकांमध्ये तापासह पुरळ येण्याचा प्रकार आढळल्यास तो गोवर असू शकतो. त्यामुळे पालकांनी काळजी घ्यावी, असे आवाहन तज्ज्ञांनी केले आहे.
पाच वर्षांपर्यंतच्या बालकांमध्ये गोवरचा ताप येऊ शकतो. सध्या जिल्ह्यात तापाची साथ सुरू आहे. डेंग्यू, चिकुन गुन्या हे आजारही मोठ्या प्रमाणात फैलावले आहेत. अशावेळी बालकांना ताप आला आणि त्यातच अंगावर पुरळ दिसत असेल तर तो ताप गोवरचाही असू शकतो. जिल्ह्यात गोवरचे प्रमाण सध्या तरी नगण्य आहे. मात्र ही दोन्ही लक्षणे आढळत असतील तर बालकांवर वेळीच उपचार करून घ्यावा.
..असे केले जाते निदान
शक्यतो लहान मुलांमध्ये ताप येणे आणि अंगावर पुरळ येणे ही गोवरची लक्षणे आहेत.
त्यातच अनेक बालकांना सर्दी आणि खोकल्याचाही त्रास जाणवतो. डोळ्यांना इन्फेक्शन होऊन चिकटतात.
ही लक्षणे असल्यास तो ताप गोवरचा असू शकतो. गोवरची साथ नसली तरी काळजी घेणे गरजेचे आहे.
९५ टक्के गोवर-रुबेलाचे लसीकरण
n बालकांमध्ये गोवरची साथ उद्भवू नये यासाठी तीन वर्षांपूर्वी गोवर-रुबेला लसीकरणाची मोहीम जिल्ह्यात राबविण्यात आली.
n या मोहिमेत जिल्ह्यातील पाच वर्षांपर्यंतच्या बालकांना लसीकरण करण्यात आले आहे.
n ९५ टक्के लसीकरण जिल्ह्यात पूर्ण झाले असल्याची माहिती मिळाली.
...तर डॉक्टरांना दाखवा
n सध्या तापाची साथ सुरू आहे. त्यात डेंग्यू आणि चिकुन गुन्यासारख्या साथी आहेत. मात्र मुलांमध्ये ताप, अंगावर पुरळ येणे यांसारखी लक्षणे मुलांमध्ये आढळत असतील तर दुर्लक्ष करू नये. त्वरित डॉक्टरांच्या सल्ल्याने उपचार घ्यावेत.
गोवरच्या रुग्णांची संख्या अत्यल्प आहे. ही साथ नाही. मुलांना ताप येणे आणि अंगावर लाल रंगाचे पुरळ या तापात येते. तसेच डोळे येणे, खोकला आणि सर्दीही गोवरच्या तापात होते. विशेष म्हणजे अंगावरील पुरळाला खाज येत नाही. ती डोक्यापासून पायापर्यंत जाते. अशा प्रकारची लक्षणे असल्यास तो ताप गोवरचा असू शकतो.
- डॉ.श्याम जेथलिया