परभणी : प्रत्येक व्यक्तीने किमान दहा झाडांची लागवड करून त्यांचे संगोपन केले पाहिजे. पर्यावरणाच्या संरक्षणासाठी प्रत्येकाने जबाबदारीने वर्तन करावे, असे आवाहन जिल्हाधिकारी दीपक मुगळीकर यांनी केले आहे.
येथील विभागीय वन अधिकारी कार्यालयाच्या वतीने २१ मार्च रोजी जागतिक वनदिन कार्यक्रम घेण्यात आला. याप्रसंगी मुगळीकर बोलत होते. कार्यक्रमास जि. प.चे मुख्य कार्यकारी अधिकारी शिवानंद टाकसाळे, आयुक्त देविदास पवार, सहयोगी अधिष्ठाता सय्यद ईस्माईल, प्रा. हिराकांत काळबांडे, आदींची उपस्थिती होती.
विभागीय वन अधिकारी कामाजी पवार यांनी प्रास्ताविक केले. वनरक्षक मंगल कुंभकर्ण यांनी सूत्रसंचालन केले. ऋषिकेश चव्हाण यांनी आभार मानले. या कार्यक्रमात कृषी विद्यापीठाचे सहयोगी प्रा. हिराकांत काळपांडे यांनी वनविभागाकडून उच्च प्रतीच्या रोपांचा पुरवठा होत असल्याचे सांगितले. विद्यापीठ परिसरात पाच हजार झाडांची लागवड करून ही झाडे जिवंत ठेवल्याबद्दल जिल्हाधिकाऱ्यांच्या हस्ते सत्कार करण्यात आला. कार्यक्रमाच्या यशस्वीतेसाठी विभागीय वन अधिकारी कामाजी पवार, वन परिक्षेत्र अधिकारी जयसिंग कच्छवे, काशिनाथ भंडारे, सुरेखा नरवाडे यांची उपस्थिती होती.