स्नेहल, रोहित यांनी जिंकले सुवर्ण; जळगावच्या भावंडांनी पिकलबॉल स्पर्धा गाजवली

लोकमत न्यूज नेटवर्क - मुंबई : येथे सुरु असलेल्या अल्टिमेट पिकलबॉल चॅम्पियनशीप स्पर्धेत जळगावच्या भावंडांनी आपला दबदबा राखला आहे. स्नेहल पाटीलने १९ वर्षांखालील गटात आणि खुल्या गटात एकेरीचे सुवर्ण पदक पटकावल्यानंतर मुलांच्या १९ वर्षांखालील गटातही स्नेहलचा भाऊ रोहित पाटील याने सुवर्ण जिंकले.

अखिल भारतीय पिकलबॉल संघटनेच्या (एआयपीए) मान्यतेने आणि प्रो वर्ल्ड टॅलेंट स्पोर्ट्सच्या वतीने गोरेगाव येथील बॉम्बे एक्झिबिशन सेंटरमध्ये सुरु असलेल्या या स्पर्धेत मुलांच्या १९ वर्षांखालील एकेरी अंतिम सामन्यात रोहित पाटीलला जेतेपद पटकावण्यासाठी तीन सेटपर्यंत झुंजावे लागले. अमोल रामचंदाने याने पहिला सेट जिंकून शानदार आघाडी घेतली. परंतु, यानंतर त्याला आपली आघाडी कायम राखण्यात यश आले नाही. रोहितने जबरदस्त पुनरागमन करताना ६-११, ११-९, १२-१० असा विजय मिळवत दिमाखात सुवर्ण पटकावले. 

त्याआधी, स्नेहल पाटीलने १९ वर्षांखालील आणि खुल्या गटाच्या अंतिम सामन्यात बाजी मारताना दोन सुवर्णपदके पटकावली. ऐकांश चौहानने १६ वर्षांखालील मुलांच्या अंतिम सामन्यात बाजी मारताना. १९ वर्षांखालील गटाच्या अत्यंत चुरशीच्या झालेल्या अंतिम सामन्यात स्नेहलने लक्षिता चितळेचे कडवे आव्हान १५-१३, असे परतावले. लक्षिताने प्रत्येक गुणासाठी स्नेहलला चांगली लढत दिली. मात्र, अखेरच्या क्षणी स्नेहलने आपल्या अनुभवाच्या जोरावर बाजी मारताना सुवर्ण पटकावले. काव्या एन. हिने कांस्यपदक जिंकताना सौम्य लेलेला ११-३ असे नमवले.

यानंतर खुल्या गटातही जबरदस्त वर्चस्व राखताना स्नेहलने अंतिम सामन्यात प्रियांका मेहताचे आव्हान ११-२, ११-६, असे सहज परतावले. या लढतीत स्नेहलच्या वेगवान आणि आक्रमक खेळापुढे प्रियांकाला फारशी संधी मिळाली नाही. कांस्यपदकाच्या लढतीत अनुजा महेश्वरीने अनपेक्षित विजय मिळवताना अनुभवी वृशाली ठाकरेचा १५-११, असा पराभव केला.