ऑनलाइन लोकमत
मुंबई, दि. 2 - ऑलिम्पिक सुवर्णपदक विजेता नेमबाज अभिनव बिंद्रा यांचं आयुष्य आता मोठ्या पडद्यावर पाहायला मिळणार आहे. कारण अभिनव बिंद्रा यांच्या आयुष्यावर आधारित सिनेमाची लवकर निर्मिती होणार आहे.
ही बातमी वाचून तुम्हाला प्रश्न पडला असेल की मोठ्या पडद्यावर अभिनव बिंद्राची भूमिका कोण साकारणार बरे?...
तुमची उत्सुकता अधिक काळ ताणून न ठेवता लगेचच उत्तर देतो... तर अभिनव बिंद्रा यांची भूमिका दुसरे तिसरे कुणी नाही तर दिग्दर्शक राकेश ओमप्रकाश मेहरा यांच्या ""मिर्झिया"" सिनेमाद्वारे बॉलिवूडमध्ये पर्दापण करणारा हर्षवर्धन कपूर साकारणार आहे.
या सिनेमाचे आणखी विशेष आकर्षण म्हणजे अभिनव यांच्या वडिलांची भूमिका अभिनेता अनिल कपूर साकारणार आहे.
म्हणजे रिअल लाईफमधील पितापुत्राची जोडी आता रील लाईफमध्ये पितापुत्राची भूमिका साकारणार आहेत.
मिळालेल्या माहितीनुसार, पिता-पुत्र अनिल कपूर व हर्षवर्धन कपूरनं हा सिनेमा साइन केला आहे. याबाबत प्रसिद्धी माध्यमांनी अनिल कपूर यांना प्रश्न विचारला असता ते म्हणाले की, "सध्या सिनेमाबाबत कोणतेही भाष्य करणं योग्य ठरणार नाही. सर्व गोष्टी अंतिम स्वरुपात ठरल्यानंतर मी याबाबत चर्चा करेन. हर्षवर्धनसोबत काम करण्यासाठी मी खूपच उत्साहीत आहे. मात्र आता यासंदर्भात काहीही बोलणं अयोग्य ठरेल".
अभिनव बिंद्रा यांच्या आयुष्यावर आधारित सिनेमाच्या शुटिंगची सुरुवात ऑक्टोबरपासून होण्याची शक्यता आहे. दरम्यान, हा सिनेमा अभिनव आणि त्यांचे वडिलांसोबतचे संबंध यावर अधिक केंद्रीत असल्याची माहितीदेखील मिळत आहे.
मुबारकामध्ये अनिल-अर्जुन एकत्र
तर दुसरीकडे आगामी सिनेमा ""मुबारका""मध्ये अनिल कपूर आणि त्यांचा पुतण्या अर्जुन कपूर एकत्र दिसणार आहेत. हा एक विनोदी सिनेमा आहे. याबाबत सांगताना अनिल कपूर म्हणाले की, "मी आणि पुतण्या अर्जुन कपूर एकत्र दिसणार आहोत. माझी आई ""मुबारका"" सिनेमा पाहून अतिशय आनंदित होईल. कारण मुलगा आणि नातूला ती एकत्र पाहणार आहे."
अनीस बज्मी दिग्दर्शित हा सिनेमा 28 जुलै रोजी बॉक्सऑफिसवर झळकणार आहे.