ँपुण्यावर पाणी कपातीचे संकट: धरणांमधील पाणी साठा निम्माच मुळा, निरा, भिमा,कृष्णा खोर्‍यांची स्थितीही गंभीर

पुणे: पावसाअभावी पुणे व आसपासच्या धरणे अर्ध्यापेक्षाही कमी भरली आहेत. येत्या काही दिवसात पाऊस झाला नाही तर पाण्याची स्थिती गंभीर होण्याची चिन्हे आहेत. खडकवासला, टेमघर, वरसगाव, पानशेत या मुळा खोर्‍यातील ४ धरणांमध्ये मिळून अवघा १४.७७ दश्लक्ष घनफूट पाणीसाठा आहे. मागील वर्षी याच काळात तो २६.४२ दशालक्ष घनफूट होता.
पुणे शहराचा पाणी पुरवठा याच चार धरणांवर अवलंबून आहे. सुरूवातीच्या काळात धरणक्षेत्रांमध्ये बर्‍यापैकी पाऊस झाला. त्यानंतर मात्र पावसाने जी पाठ फिरवली आहे ती सप्टेंबर सुरू झाला तरी अद्याप कायम आहे. मुळा खोर्‍याबरोबरच पुण्याच्या आसपासच्या सर्वच धरणांमध्ये पाणी साठ्याची स्थिती गंभीर आहे.
निरा खोर्‍यात पवना, कासारसाई, मुळशी, कलमोडी, चासकमान, भामाअसखेड, आंध्र, वडिवळे, गुंजवणी, भाटघर, निरा देवधर, वीर, या धरणांमध्ये मिळून फक्त २६.३३ घनलक्ष फूट पाणीसाठा आहे. मागील वर्षी या महिन्यात हा पाणी साठा ४४ . ९७ दशलक्ष घनफूट होता. नाझरे, पिंपळगाव जोगे, माणिकडोह, येडगाव, वडज, डिंभे, घोड ही धरणे कुकडी खोर्‍यात येतात. त्यामध्ये मागील वर्षी या महिन्यात२८.६७ दश्लक्ष घनफूट पाणी होते. यंदा ते फक्त फक्त १०.४४ दश्लक्ष घनफूट आहे. त्यातही घोड, नाझरे ही धरणे तर कोरडी ठणठणीत आहेत.
कृष्णा उपखोर्‍यात धोम बलकवडी, धोम , कण्हेर, उरमोडी, तारळी, कोयना, वारणा, कासारी, तुळशी, राधानगरी, दुधगंगा, पाटगाव ही धरणे कृष्णा उपखोर्‍यात येतात. त्यातील एकूण पाणी साठा बर्‍यापैकी चांगला म्हणजे १६४.६१ दशलक्ष घनफूट आहे. मागील वर्षी तो १९५.८६ दश्लक्ष घनफूट होता. या धरणांमध्ये पाणी दिसत असले तरी तिथेही धरणक्षेत्रात सध्या पावसाने दडीच मारलेली आहे. (प्रतिनिधी)