५ वेळच्या आमदाराला पराभूत केलं; तमिळनाडूत 'ऑटो ड्रायव्हर' विजय धामू यांचा ऐतिहासिक विजय

TVK Vijay Dhamu: तमिळनाडू थलपती विजयच्या पक्षाने अनेक दिग्गजांना धक्का देत पराभूत केलं आहे.

Tamil Nadu Election Result 2026: तामिळनाडू विधानसभा निवडणुकीच्या निकालाने अनेक राजकीय दिग्गजांना धक्का दिला आहे. सुपरस्टार जोसेफ विजय म्हणजेच लाडका थलापती विजय याच्या तमिझागा वेत्री कझगम या पक्षाने धमाकेदार एन्ट्री करत मोठं यश मिळवलं आहे. अशातच थलापती विजय याच्या पक्षाच्या एका सामान्य ऑटो ड्रायव्हरच्या विजयाची चर्चा संपूर्ण देशात रंगली आहे.

कोण आहेत विजय धामू?

उत्तर चेन्नईतील रोयापुरम या अत्यंत महत्त्वाच्या विधानसभा मतदारसंघातून के. विजय धामू यांनी विजय मिळवला आहे. विजय धामू हे कोणी मोठे राजकारणी नसून, रोज रस्त्यावर रिक्षा चालवून आपल्या कुटुंबाचा उदरनिर्वाह करतात. अनेक वर्षांपासून ते थलापती विजय यांचे कट्टर चाहते असून परिसरात त्यांचा फॅन क्लब चालवतात.

दिग्गजांना चारली धूळ

विजय धामू यांच्या विजयाचे वैशिष्ट्य म्हणजे त्यांनी तामिळनाडूच्या राजकारणातील बड्या नेत्यांना पराभूत केले आहे. रोयापुरममधून सलग पाच वेळा आमदार राहिलेले आणि माजी मंत्री असणाऱ्या जयकुमार यांना विजय धामू यांनी चक्क तिसऱ्या क्रमांकावर ढकलले. तर माजी मंत्री रहमान खान यांचे सुपुत्र सुबैर खान यांनाही धामू यांनी पराभवाचा धक्का दिला.

१४,००० मतांच्या फरकाने पराभव

विजय धामू यांना ५५,००० हून अधिक मते मिळाली आहेत. त्यांनी आपल्या प्रतिस्पर्ध्याचा सुमारे १४,००० मतांच्या फरकाने पराभव केला.

स्थानिक मुद्द्यांवर प्रचार

निवडणूक प्रचारादरम्यान जेव्हा टीव्हीके पक्षाने धामू यांना उमेदवारी जाहीर केली, तेव्हा स्वतः विजय यांनी त्यांना मिठी मारली होती. या भावूक फोटोने सोशल मीडियावर मोठी चर्चा घडवून आणली आणि धामू यांना त्याचा मोठा फायदा झाला. प्रचारादरम्यान धामू यांनी मोठ्या घोषणा करण्याऐवजी स्थानिक मुद्द्यांवर भर दिला. तुम्ही आम्हाला नवीन चेहरे म्हणू शकता, पण आम्ही अनेक वर्षांपासून लोकांच्या सुख-दुःखात जमिनीवर काम करत आहोत, असे त्यांनी ठणकावून सांगितले होते. त्यांच्या याच कामाची आणि जनसंपर्काची पावती मतदारांनी त्यांना दिली आहे.