शपथविधीला येणार शरीफ

नव्या सरकारने सत्तेवर येण्यापूर्वीच शेजारी व क्षेत्रिय देशांकडे मैत्री व सद््भावनेचा हात पुढे करण्याचे यशस्वी सकारात्मक पाऊल मानले जात आहे

नवी दिल्ली : नियोजित पंतप्रधान नरेंद्र मोदी यांच्या सोमवारी होणार्‍या शपथविधी समारंभास पाकिस्तानचे पंतप्रधान मोहम्मद नवाज शरीफ यांच्यासह आता दक्षिण आशियाई सहकार्य परिषदेतील (सार्क) आठही देशांचे नेते उपस्थित राहणार आहेत. यास नव्या सरकारने सत्तेवर येण्यापूर्वीच शेजारी व क्षेत्रिय देशांकडे मैत्री व सद््भावनेचा हात पुढे करण्याचे यशस्वी सकारात्मक पाऊल मानले जात आहे. पाकिस्तानी लष्कर आणि तेथील भारतद्वेषी कट्टरपंथी यांचा दबाव झुगारून शरीफ दिल्लीला येणार की नाही याविषयीची अनिश्चितता संपुष्टात आली. स्वत: मोदी यांनी दिलेल्या निमंत्रणानुसार शरीफ दिल्लीला जाणार असल्याची पाकिस्तान पंतप्रधान कार्यालयाने शनिवारी पुष्टी केली. पंतप्रधान कार्यालयाच्या प्रवक्त्याने सांगितले की, सोमवारी सायंकाळी शपथविधीला उपस्थित राहिल्यानंतर मंगळवारी २७ मे रोजी नवाज शरीफ व पंतप्रधान मोदी यांच्यात द्विपक्षीय चर्चा होईल. पाकिस्तानचे परराष्ट्रमंत्री सरताज अझीझ हेही शरीफ यांच्यासोबत येणार आहेत. कोणाही भारतीय पंतप्रधानाच्या शपथविधीला पाकिस्तानच्या पंतप्रधानांना निमंत्रण दिले जाण्याची व त्यांनीही ते स्वीकारून उपस्थित राहण्याची ही पहिलीच वेळ असेल. लोकसभा निवडणुकीत ऐतिहासिक विजय मिळविल्यानंतर नवाज शरीफ यांनी मोदी यांना फोन करून त्यांचे अभिनंदन केले होते व पंतप्रधानपदाची सूत्रे स्वीकारल्यानंतर पाकिस्तानला भेट देण्याचे निमंत्रणही दिले होते. सूत्रांनुसार मोदी व शरीफ यांची भेट औपचारिक असेल व त्यात वादग्रस्त द्विपक्षीय मुद्द्यांवर फारसा खल होण्याची शक्यता नाही. (लोकमत न्यूज नेटवर्क)