ऑपरेशन 'विंग्स ऑफ डॉन': इस्रायल युद्धक्षेत्रात भारतीयांना वसवतोय, गुरुवारी २५० जणांना विमानाने नेले

Lost Tribe of Israel India: इस्रायल सरकारने मणिपूरच्या बनेई मेनाशे समुदायाला परत नेण्यासाठी 'ऑपरेशन विंग्स ऑफ डॉन' सुरू केले आहे. २७०० वर्षांपासून हरवलेली ही ज्यू जमात आता इस्रायलच्या उत्तर भागात स्थायिक होणार आहे. सविस्तर वाचा.

मणिपूरमधील हिंसाचार आणि इस्रायलमधील युद्ध अशा दोन्ही आव्हानात्मक परिस्थितीतून मार्ग काढत 'बनेई मेनाशे' समुदायाची घरवापसी सुरू झाली आहे. बेंजामिन नेतन्याहू सरकारने या समुदायातील सुमारे ४,६०० सदस्यांना इस्रायलमध्ये वसवण्यासाठी आर्थिक मदतीची घोषणा केली असून, दरवर्षी १,२०० लोकांना तिथे नेले जाणार आहे. गुरुवारी २५० लोकांना इस्रायलमध्ये नेण्यात आले आहे. 

कोण आहेत 'बनेई मेनाशे'?
हा समुदाय स्वतःला इस्रायलच्या १० हरवलेल्या जमातींपैकी एक असलेल्या 'मनस्से' कबील्याचे वंशज मानतो. ७२२ ईसापूर्व काळात असीरियन आक्रमकांमुळे हद्दपार झाल्यानंतर पर्शिया, अफगाणिस्तान, तिबेट आणि चीनमार्गे हा समुदाय ईशान्य भारतात पोहोचला. मणिपूर आणि मिझोराममधील कुकी, चीन आणि मिझो वांशिक गटांमध्ये हा समुदाय विभागलेला आहे.

स्थलांतरामागील प्रमुख कारणे:
मणिपूरमधील डोंगराळ भागात ज्यू धर्मातील 'मिन्यान' (१० जणांचा कोरम) आणि इतर धार्मिक सोयींची कमतरता असल्याने त्यांना इस्रायलला जाण्याची ओढ आहे. भारतात मजूर किंवा शेतकरी म्हणून काम करणाऱ्या या लोकांना इस्रायलमध्ये सुमारे ५५,००० डॉलर्स (सुमारे ४६ लाख रुपये) वार्षिक उत्पन्न मिळवण्याची संधी आहे, जे भारतातील उत्पन्नापेक्षा कैक पटीने जास्त आहे. मे २०२३ पासून मणिपूरमध्ये सुरू असलेल्या मेतेई आणि कुकी संघर्षाने या समुदायाचे जीवन अधिक कठीण केले आहे.

इस्रायल या समुदायाला का वसवू इच्छितो, यामागे काही महत्त्वाची कारणे आहेत. या लोकांना उत्तर इस्रायल आणि गॅलिली सारख्या संवेदनशील सीमावर्ती भागात वसवले जाणार आहे, जेणेकरून तिथे लोकसंख्या संतुलन राखता येईल. २०२३ च्या युद्धात मणिपूरमधून गेलेल्या २०० हून अधिक बनेई मेनाशे सैनिकांनी इस्रायली लष्कराच्या बाजूने मोर्चे सांभाळले होते.