कच्चा साखरेच्या निर्यातीवरील अनुदान कायम ठेवणार

केंद्राचा निर्णय
नवी दिल्ली- संकटाचा सामना करीत असलेल्या साखर उद्योगाला मदतीचा हात देत केंद्र सरकारने कच्चा साखरेच्या निर्यातीवरील सबसिडी कायम ठेवण्याचा निर्णय घेतला आहे.
गुरुवारी पंतप्रधान नरेंद्र मोदी यांच्या अध्यक्षतेखाली झालेल्या मंत्रिमंडळ आर्थिकविषयक समितीच्या बैठकीत साखरेच्या चालू हंगामात २०१४-१५ (ऑक्टोबर- सप्टेंबर) कच्चा साखरेवर टनामागे ४००० रुपयांच्या हिशेबाने सबसिडी देण्याचा निर्णय झाला. जी कंपनी साखरेची निर्यात पहिले करेल तिला सबसिडीतही प्राधान्य मिळणार आहे. आधी हे अनुदान टनाला ३,३७१ रुपये होते. हे वाढीव अनुदान १४ लाख टन साखरेच्या निर्यातीसाठी मिळेल.
सूत्रांनी दिलेल्या माहितीनुसार कच्चा साखरेच्या निर्यातीवर मिळणाऱ्या अनुदानाच्या नियमात फारसा बदल करण्यात आलेला नाही. केवळ एका बाबतीत सवलत देण्यात आली आहे. एखाद्या साखर गिरणीची अल्कोहोल उत्पादनाची क्षमता असल्यास आणि या गिरणीने सरकारी तेल कंपन्यांना इथनॉथ पुरवठ्याचा प्रस्ताव दिला तरच तिला हे अनुदान मिळू शकेल. कच्चा साखर निर्यातीला प्रोत्साहन दिल्यास साखर गिरण्यांना शेतकऱ्यांची थकबाकी देण्यास मदत मिळणार आहे.
(प्रतिनिधी)