केजरीवाल यांना विनोद कुमार बिन्नींचे आव्हान

दिल्लीत पुन्हा विधानसभा निवडणुकीचे वारे वाहत असतानाच आम आदमी पक्षाचे प्रमुख अरविंद केजरीवाल यांच्यावर पक्षातील दोन आमदारांनीच जोरदार टीका करत आपची डोकेदुखी वाढवली आहे.

ऑनलाइन लोकमत

नवी दिल्ली, दि. १० - दिल्लीत पुन्हा विधानसभा निवडणुकीचे वारे वाहत असतानाच आम आदमी पक्षाचे प्रमुख अरविंद केजरीवाल यांना स्वपक्षातील दोन आमदारांनीच आव्हान दिले आहे. दिल्लीच्या जनतेची दिशाभूल करणा-यांचा पर्दाफाश करु असे सांगत आपमधील बंडखोर आमदार विनोदकुमार बिन्नी यांनी अरविंद केजरीवाल यांच्याविरोधात निवडणूक लढवण्याची तयारी केली आहे. तर विद्यमान आमदान मनिंदर सिंग धीर यांनीदेखील आपमध्ये लोकशाही राहिली नाही अशी टीका केली आहे. 

विधानसभा बरखास्त झाल्याने दिल्लीत पुन्हा नव्याने विधानसभा निवडणुका घेतल्या जाणार आहेत. यंदा बहुमत मिळवण्याच्या इराद्याने आम आदमी पक्ष मैदानात उतरला असला तरी पक्षाचे विद्यमान आमदारच पक्षावर टीका करताना दिसत आहेत. आपच्या तिकीटावर निवडून आलेले पण सध्या पक्षातील बंडखोर आमदार विनोद कुमार बिन्नी यांनी थेट केजरीवाल यांच्याविरोधातच निवडणूक लढवण्याची तयारी सुरु केली आहे. तर जंगपूरा येथील आमदार मनिंदर सिंग धीर यांनीदेखील आपवर टीका केली. आपमध्ये लोकशाही अस्तित्ताव राहिली नाही अशी टीका करतानाच धीर यांनी पंतप्रधान नरेंद्र मोदी यांच्या कामाचे भरभरुन कौतुक केले आहे. 

मनिंदर सिंग धीर यांना आपने पुन्हा उमेदवारी नाकारल्याने ते नाराज आहेत. आप सरकारच्या काळात दिल्ली विधानसभेचे अध्यक्ष असलेले धीर यांनी विधानसभेचे कामकाज सक्षमपणे सांभाळले नव्हते व त्यामुळे आपचे नेतृत्व धीर यांच्या कामकाजावर नाखूष असल्याची चर्चा आहे. मात्र दोन विद्यमान आमदारांनी टीकास्त्र सोडल्याने केजरीवाल यांच्या समोरील आव्हान वाढले आहे.