थोडक्यात

रिव्हॉलवरच्या धाकात लाखोंंची लूट
मंुबई: रिव्हॉलवरचा धाक दाखवून लोकमान्य टिळक मार्गावरील एका कार्यालयात शिरलेल्या चार लुटारूंनी तेथून सुमारे १५ लाखांचा ऐवज लुटला. ही घटना शुक्रवारी रात्री अकराच्या सुमारास घडली. याप्रकरणी लो. टि. मार्ग पोलिसांनी जबरी चोरीचा गुन्हा नोंदवून तपास सुरू केला आहे. लुटमारीआधी आरोपींनी कार्यालयातील जितेंद्र अमरसिंग राजपुरोहित या कर्मचार्‍याचे रिव्हॉल्वरच्या धाकात हातपाय बांधले,त्याला मारहाणही केली.

मौलवीकडून चिमुरडीचा विनयभंग
मुंबई - गोवंडी, शिवाजी नगरमधील एका मदरशामध्ये अरबी शिकवणार्‍या मौलवीला पोलिसांनी अटक केली. महोम्मद उस्मान शहा(४०) असे अटक आरोपीचे नाव आहे. मदरशात शिकणार्‍या सात वर्षांच्या चिमुरडीने केलेल्या तक्रारीवरून शिवाजीनगर पोलिसांनी शहा याला अटक केली. त्याने याआधी मदरशातल्या अन्य मुलींवर अत्याचार केले आहेत का याचा तपास पोलीस करत आहेत.


बोगस पत्रकाराला अटक
मुंबई: रेशनिंगचा काळाबाजार प्रसिद्ध करण्याची धमकी देऊन खंडणी उकळणार्‍या तोतया पत्रकाराला भांडुप पोलिसांनी अटक केली. वैभव सावंत(३८) असे आरोपीचे नाव असून त्याची रवानगी पोलीस कोठडीत करण्यात आली आहे. भांडुप टंेभीपाडा परिसरात असलेल्या रेशनिंग दुकानदार रतनजी गाला यांंच्याकडे त्याने महिना ५ हजाराची मागणी केली होती.


बोरिवलीतील बेपत्ता व्यवसायिकाचा मृतदेह मढ बिचवर
मुंबई : आठवड्यापूर्वी बोरिवलीतून बेपत्ता झालेल्या व्यवसायिकाचा मृतदेह मालाडच्या मढ बिचवर सापडला. व्यवसायात झालेल्या नुकसानामुळे त्याने हे पाऊल उचलल्याचा प्राथमिक संशय आहे. याप्रकरणी मालवणी पोलिसांनी अपघाती मृत्यूची नोंद केली असून मृतदेह शवविच्छेदनासाठी पाठविण्यात आला आहे. विपूल शाह असे या व्यवसायिकाचे नाव असून तो मुळचा बोरिवलीचा रहिवासी आहे. बोरिवलीत त्याचे इमीटेशन ज्वेलरीचे दुकान आहे. सात फेब्रुवारीपासून विपुल घरातून बेपत्ता झाला होता. सर्वत्र शोधल्यानंतरही त्याचा काहीच पत्ता न लागल्याने त्याच्या पत्नीने तो हरविल्याची तक्रार बोरिवली पोलीस ठाण्यात दाखल केली होती. सुत्रांनी दिलेल्या माहितीनुसार, विपुल कर्जबाजारी होता, त्यामुळे त्याने आत्महत्या केली असावी असा संशय व्यक्त करण्यात येत आहे. मालवणी पोलीस याप्रकरणी अधिक तपास करत आहेत.