बॅडमिंटन भारत

सायना, श्रीकांत यांची
विजयी सुरुवात
दुबई : भारताची स्टार सायना नेहवाल आणि युवा खेळाडू के. श्रीकांत यांनी बुधवारपासून येथे सुरू झालेल्या विश्व सुपर सिरिजच्या अंतिम लीग बॅडमिंटन स्पर्धेत आपापले सामने जिंकले.
विश्व क्रमवारीत चौथ्या स्थानावर असलेल्या सायनाने अ गटात विश्व क्रमवारीतील दुसऱ्या स्थानावरील खेळाडू चीनची शिजियान वाँग हिचा ५८ मिनिटांच्या खेळात २१-१७, २१-१७ असा सलग दोन गेममध्ये पराभव केला. सायनाचा शिजियानविरुद्ध कारकीर्दीतील हा ११ सामन्यातील सहावा विजय होता. याआधी दोन्ही खेळाडू ५-५ ने बरोबरीत होत्या.
पहिल्यांदा या स्पर्धेत खेळणारा विश्व क्रमवारीत आठव्या स्थानावर असलेल्या श्रीकांतने जपानचा केंतो मोमोतो याच्याविरुद्ध पहिला गेम गमावल्यानंतरही मुसंडी मारताना एका तासाच्या संघर्षात १५-२१, २१-१६, २१-१० ने पराभूत केले.
सायनाला यंदा शिजियानकडून चारपैकी तीन सामन्यात पराभवांचा फटका बसला होता. गेल्या दोन सामन्यात सायना फ्रेंच ओपन आणि डेन्मार्क ओपनमध्ये पराभूत झाली. सायनाने शिजियानवर ऑस्ट्रेलियन ओपनमध्ये विजय मिळविला खरा; पण त्याआधी ऑल इंग्लंडमध्ये सायनाला प्रतिस्पर्धी खेळाडूकडून मात खावी लागली. (वृत्तसंस्था)