आझमगड म्हणजे आतंकवादी गड - अमित शहा

भाजप नेते व मोदींचे विश्वासू साथीदार अमित शहा यांनी आझमगडला आतंकवादी गड असे संबोधित केल्याने नवीन वाद निर्माण झाला आहे.

ऑनलाइन टीम
बलिया, दि. ५ - भाजप नेते व मोदींचे विश्वासू साथीदार अमित शहा यांनी आझमगडला आतंकवादी गड असे संबोधित केल्याने नवीन वाद निर्माण झाला आहे. समाजवादी पक्षाचे सरकार दहशतवाद्यांना सोडून देत असल्याने आझमगडमध्ये दहशतवाद्यांचे प्रमाण जास्त आहे असा आरोपही त्यांनी केला आहे. 
रविवारी आझमगडमधील भाजप उमेदवार रमाकांत यादव यांच्या प्रचारासाठी अमित शहा यांनी सभा घेतली. या सभेत त्यांनी आझमगड हे दहशतवाद्यांचे शहर बनल्याची टीका केली. 'उत्तरप्रदेश सरकारला कसलीही भिती नसून गुजरातमध्ये बाँबस्फोट करणारे आरोपी हे आझमगढचेच होते. या दहशतवाद्यांना मी गृहमंत्री असताना तुरुंगात टाकले. त्यानंतर गुजरातमध्ये कधीच बाँबस्फोट झाले नाही' असा दावाही त्यांनी केला. 
अमित शहांच्या आझमगडविषयीच्या विधानाचा काँग्रेस नेते दिग्विजय सिंह यांनी तीव्र शब्दात निषेध दर्शवला आहे. निवडणूक आयोगाने अमित शहांवर कारवाई करावी अशी मागणी त्यांनी केली आहे. तर अमित शहांच्या विधानाने आझमगड व उत्तरप्रदेशमधील काही भागांमध्ये कायदा व सुव्यवस्थेचा प्रश्न निर्माण होईल. त्यामुळे असे प्रक्षोभक विधान करणा-या अमित शहांवर कारवाई व्हावी अशी मागणी बहुजन समाज पक्षाच्या सर्वेसर्वा मायावती यांनी केली आहे.