खळबळजनक! आंध्र प्रदेशमध्ये भेसळयुक्त दूध प्यायल्याने १६ जणांचा मृत्यू, तिघांची प्रकृती गंभीर

आंध्र प्रदेशातील गोदावरी जिल्ह्यात घडलेल्या घटनेने संपूर्ण देश हादरला आहे. भेसळयुक्त दूध प्यायल्याने आतापर्यंत १६ लोकांचा मृत्यू झाला असून तिघांची प्रकृती अद्याप गंभीर आहे.

आंध्र प्रदेशातील गोदावरी जिल्ह्यात घडलेल्या घटनेने संपूर्ण देश हादरला आहे. मिळालेल्या माहितीनुसार, भेसळयुक्त दूध प्यायल्याने आतापर्यंत १६ लोकांचा मृत्यू झाला असून तिघांची प्रकृती अद्याप गंभीर आहे. लालाचेरुवू, चौदेस्वरनगर आणि स्वरूपनगर यांसारख्या भागात फेब्रुवारी महिन्यापासूनच लोक आजारी पडू लागले होते.

दूध प्यायल्यानंतर लोकांना उलट्या, पोटदुखी आणि किडनी फेल होणं यांसारख्या गंभीर समस्या जाणवू लागल्या. सुरुवातीला २२ फेब्रुवारी रोजी काही प्रकरणांची नोंद झाली, परंतु तपासणीत असं समोर आले की, एका स्थानिक डेअरी युनिटमधून पुरवठा करण्यात आलेल्या दुधात 'इथिलिन ग्लायकॉल' हा विषारी पदार्थ मिसळलेला होता. या भेसळीमुळे २० हून अधिक लोकांना रुग्णालयात दाखल करावं लागलं, ज्यामध्ये लहान मुलं आणि वृद्धांचा समावेश होता. आतापर्यंत या घटनेतील मृतांचा आकडा १६ वर पोहोचला आहे, तर ३ रुग्ण अजूनही आयसीयूमध्ये मृत्यूशी झुंज देत आहेत.

नरसापुरम गावातील एका डेअरी युनिटमधून १०० हून अधिक कुटुंबांना दूध पोहोचवण्यात आलं. दूध प्यायल्यानंतर काही तासांतच ग्राहकांमध्ये गंभीर लक्षणं जाणवू लागली, त्यानंतर त्यांना डायलिसिस आणि व्हेंटिलेटर सपोर्टची गरज भासली. आरोग्य विभागाच्या तपासणीत दुधात इथिलिन ग्लायकॉल मिसळल्याची पुष्टी झाली आहे, हा पदार्थ किडनी आणि इतर अवयवांचं कायमस्वरूपी नुकसान करतो. अनेक रुग्णांमध्ये ब्लड यूरिया आणि सीरम क्रिएटिनिनची पातळी असामान्यपणे वाढलेली आढळली. हा पदार्थ प्रामुख्याने 'अँटी-फ्रीझ' म्हणून वापरला जातो आणि खाद्यपदार्थांमध्ये याची भेसळ करणं अत्यंत घातक आहे.

घटनेनंतर दुधाचा पुरवठा तातडीने थांबवण्यात आला असून बाधित भागात 'डोअर-टू-डोअर' सर्व्हे करण्यात आला आहे. प्रशासनाने या प्रकरणाची गंभीर दखल घेतली असून संशयित दूध विक्रेत्याला अटक करण्यात आली आहे. अन्न सुरक्षा विभागाने डेअरी युनिटला भेट देऊन दूध, दही, तूप आणि पाण्याचे नमुने घेतले आहेत. पशुसंवर्धन विभागाने पशुखाद्य आणि पाण्याचीही तपासणी केली आहे. पोलिसांनी गुन्हा दाखल केला असून हैदराबादचे वरिष्ठ आरोग्य अधिकारी परिस्थितीवर लक्ष ठेवून आहेत.