१८... सारांश

टेकाडी येथे दत्तप्रभूंची पालखी यात्रा
पारशिवनी : श्री दत्तप्रभूंच्या जन्मोत्सवानिमित्त टेकाडी येथे पालखी यात्रा काढण्यात आली. यात पालोरा, पारशिवनी, तामसवाडी, भागीमहारी, करंभाड, दहेगाव, पारडी, खंडाळा, पिपळा, गवणा, गरांडा येथील भाविक, भजन व दिंडी मंडळ सहभागी झाले होते. महाप्रसादाने कार्यक्रमाची सांगता करण्यात आली.
***
राखेच्या ढिगाऱ्यांमुळे नागरिक त्रस्त
पारशिवनी : पारशिवनी-खापरखेडा मार्गावर ठिकठिकाणी वीज केंद्रातील राख पडलेली आहे. वाहनांमुळे ही राख उडत असून, ती राख वाहनचालकांच्या डोळ्यात जात असल्याने अपघात होत आहेत. त्यामुळे या मार्गावरील राखेची वाहतूक बंद करण्याची मागणी नागरिकांनी केली आहे.
***
तुरीवर किडींचा प्रादुर्भाव
पारशिवनी : कडाक्याची थंडी आणि धुक्यांमुळे तुरीचा बहार गळायला सुरुवात झाली असून, किडींचा प्रादुर्भाव व्हायला सुरुवात झाली आहे. सोबतच कपाशी, फुलकोबी व हरभऱ्याचेही नुकसान होत आहे. त्यामुळे तालुक्यातील शेतकरी चिंताग्रस्त आहेत.
***
कामठीत कौमी एकता फुटबॉल स्पर्धा
कामठी : स्थानिक पोलिसांच्यावतीने आयोजित करण्यात आलेल्या कौमी एकता फुटबॉल स्पर्धेचे उद्घाटन शुक्रवारी सायंकाळी ४ वाजता सेठ केसरीमल पोरवाल महाविद्यालयाच्या मैदानावर होणार आहे. याप्रसंगी विशेष पोलीस महानिरीक्षक रवींद्र कदम, डॉ. आरती सिंह उपस्थित राहणार असून, या स्पर्धेत १४ संघ सहभागी झाले आहेत.
***
मतदानाचा अधिकार देण्याची मागणी
मौदा : विधान परिषदेच्या निवडणुकीत पंचायत समिती सदस्यांना मतदान करण्याचा अधिकार द्यावा, स्थानिक विकास निधी १५ लाखांपर्यंत वाढवावा, अशी मागणी पंचायत समिती सदस्य शीला मदनकर, शोभा बागडे, नलिनी पठाळे आदींनी केली असून, राज्यपालांना नुकतेच निवेदन सादर केले आहे.
***
शिक्षक संघाचे वार्षिक अधिवेशन
मौदा : विदर्भ माध्यमिक शिक्षक संघाच्या नागपूर शाखेचे वार्षिक अधिवेशन मौद्यातील जनता विद्यालयाच्या प्रांगणात रविवारी (दि.२१) होणार आहे. यात शिक्षक व शिक्षकेतर कर्मचाऱ्यांच्या महत्त्वाच्या समस्यांवर चर्चा केली जाईल. सदर अधिवेशनाला उपस्थित राहण्याचे आवाहन आयोजकांनी केले आहे.
***
सार्वजनिक उद्यानाची दैनावस्था
टाकळघाट : नजीकच्या बुटीबोरी एमआयडीसी परिसरातील सार्वजनिक उद्यानाची देखभाल व दुरुस्तीअभावी दैनावस्था होत आहे. त्यामुळे ज्येष्ठ नागरिक व चिमुकल्यांना फिरण्या व खेळण्यासाठी त्रास होत असल्याने, या उद्यानाची दुरुस्ती करण्याची मागणी ज्येष्ठ नागरिकांनी केली आहे.
***