१७ धरणे आंदोलन

विदर्भ माध्यमिक शिक्षक संघ
नागपूर : शाळा, आश्रमशाळांमधील माध्यमिक, उच्च माध्यमिक शिक्षक-शिक्षकेतर कर्मचाऱ्यांच्या प्रलंबित मागण्यांकडे लक्ष वेधण्यासाठी विदर्भ माध्यमिक शिक्षक संघाच्या वतीने हिवाळी अधिवेशनानिमित्त धरणे आंदोलन करण्यात आले.
प्रमुख मागण्या : सन २०१३-१४ ची वादग्रस्त व अन्यायकारक संच मान्यता रद्द करणे व जिल्हा शिक्षणाधिकाऱ्यांनी काढलेल्या आदेशापूर्वी नियुक्त शिक्षण सेवकांना सेवेत सुरक्षित ठेवावे, ६ मे २०१३ च्या शासन निर्णयाप्रमाणे शिक्षण सेवकांच्या नियुक्त्यांना मान्यता द्यावी, केंद्रीय कर्मचाऱ्यांसाठी ७ टक्के महागाई भत्ता वाढीच्या धर्तीवर राज्य शासनाने थकबाकीसह जानेवारीच्या वेतनासोबत द्यावा, नागपूर जिल्हा परिषदेच्या शिक्षणाधिकाऱ्याने गेल्या दोन महिन्यात घेतलेल्या नियमबाह्य निर्णयांची चौकशी करावी आदी मागण्यांचा समावेश आहे.
नेतृत्व : संघटनेचे सरकार्यवाह माजी आमदार व्ही. यु. डायगव्हाणे कार्यकर्ते : दत्तात्रय मिर्झापुरे, आनंद कारेमोरे, विठ्ठल जुनगरी, संजय वारकर, अनिल गोतमारे, मिलिंद वानखेडे, धनराज राऊत, सुधाकर अडबाले, अरविंद देशमुख, राजेश धुर्वे, महेंद्र सालंकार, लक्ष्मण धोबे आदी.
संयुक्त शिक्षक कृती मंच, राजुरा
नागपूर : शिक्षकांवर सातत्याने अन्याय करणाऱ्या राजुरा पंचायत समितीत कार्यरत गटशिक्षणाधिकाऱ्याला निलंबित करण्यात यावे यासह इतर मागण्यांसाठी संयुक्त शिक्षक कृती मंच, राजुरातर्फे धरणे आंदोलन करण्यात येत आहे.
प्रमुख मागण्या : कार्यालयात उपस्थित असतानाही शिक्षक आमदार नागो गाणार यांनी घेतलेल्या बैठकीला न आलेल्या गटशिक्षणाधिकाऱ्याला निलंबित करावे, वारंवार पत्रव्यवहार करूनही संघटनेची सहविचार सभा घेण्यात येत नाही, आयकर विवरणात खोडतोड करून शिक्षकांची फसवणूक, शिक्षकांचे वेतन १५ तारखेच्या आत केले जात नाही, रजा घेण्यासाठी पैशाची मागणी केली जाते, गुणवत्ता शिष्यवृत्तीचे वाटप करण्यात आले नाही, अपंग कर्मचाऱ्यांना विशेष वाहन भत्ता देण्यास टाळाटाळ, सीईसी प्रशिक्षणातील तज्ज्ञ व प्रशिक्षणार्थ्यांचे मानधन कार्यालयाला प्राप्त होऊनही ते वाटप न करणे आदी आरोप गटशिक्षणाधिकाऱ्यावर शिक्षकांनी ठेवले आहे. त्यामुळे गटशिक्षणाधिकाऱ्याला निलंबित करावे अशी मागणी शिक्षकांनी केली आहे.
नेतृत्व : संघटनेचे संयोजक मुकुंद जुनघरे कार्यकर्ते : बाबुराव पहानपटे, संजय लांडे, किसन कांबळे, वामन साळवे, श्रीनिवास गोरे, मेघराज उपरे आदी.