सहा कोटींचा अपहार; २४ संशयितांवर गुन्हा

श्री गणेश बॅँक : अधिकारी-कर्मचाऱ्यांचा समावेश, गैरव्यवहार उघड

नाशिक : श्री गणेश सहकारी बॅँकेचे अधिकारी व कर्मचाऱ्यांनी आपापसात संगनमत करून बनावट कर्जप्रकरणे दाखल करून घेत बॅँक व ठेवीदारांचा विश्वासघात करत सुमारे ६ कोटी ७ लाख १५ हजार रुपयांचा अपहार केल्याचा धक्कादायक प्रकार लेखापरीक्षणात उघडकीस आला आहे. याप्रकरणी सरकारवाडा पोलीस ठाण्यात एकूण २४ संशयितांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, अशोकस्तंभावरील श्री गणेश नागरी सहकारी बॅँकेतील २४ कर्मचाऱ्यांनी आपापसात संगनमत करत सहा कोटी रुपयांपेक्षा अधिक रकमेचा अपहार केल्याची बाब सनदी लेखापाल अजय नंदलाल राठी यांच्या निदर्शनास आली.
राठी यांनी याबाबत संबंधितांच्या नावांसह सरकारवाडा पोलीस ठाण्यात फिर्याद दिली असून, त्यांच्या फिर्यादीवरून पोलिसांनी एकूण २४ संशयितांविरुद्ध गुन्हा दाखल केला आहे. दाखल झालेल्या फिर्यादीनुसार पोलिसांनी पडताळणी सुरू केली असून, या प्रकाराचा तपास वेगाने सुरू केल्याची माहिती वरिष्ठ पोलीस निरीक्षक डॉ. सीताराम कोल्हे यांनी दिली आहे.
श्री गणेश सहकारी बॅँकेमध्ये २०१२ ते २०१४ सालापर्यंत कार्यरत असलेले अधिकारी, कर्मचारी, लिपिक, शाखा व्यवस्थापक यांनी संगनमताने बॅँकेचा व ठेवीदारांचा विश्वासघात करून बॅँकेत बनावट कर्जप्रकरणे दाखल करून घेत एवढ्या मोठ्या रकमेचा अपहार केल्याचे फिर्यादीत म्हटले आहे. राठी यांनी बॅँकेचे संपूर्ण लेखापरीक्षण केले असता सदरचा गैरव्यवहार त्यांच्या निदर्शनास आला.
संशयितांनी अशोकस्तंभ येथील बॅँकेच्या मुख्य शाखेत सहा कोटी सात लाख रुपयांचा अपहार करून पिंपळगाव बसवंत येथील शाखेतही अशाच प्रकारे अपहार केला आहे. दोन्ही शाखांचा मिळून ६ कोटी ७ लाख १५ हजार रुपयांचा अपहार केला आहे. (प्रतिनिधी)