सामाजिक बांधिलकीसाठी धावले नाशिककर

नाशिक रन : सुजलाम् सुफलाम्चा संदेश; विविध वयोगटातील नागरिकांचा उपक्रमात सहभाग

नाशिक : ‘रन नाशिक रन’, ‘रेडी स्टेडी गो’ अशा घोषणांसह पिस्ता रंगाचा टी शर्ट परिधान करून हजारो नाशिककर समाजसेवेच्या हेतूने शनिवारी (दि.१४) ‘नाशिक रन’ या उपक्रमात धावले. सकाळच्या गुलाबी थंडीत आणि उगवत्या तांबूस रंगाच्या सूर्याेदयाच्या साक्षीने विविध वयोगटातील नाशिककरांनी या उपक्रमात मोठ्या संख्येने सहभाग नोंदवला.
त्र्यंबकरोड येथील महात्मानगर मैदानापासून शनिवारी सकाळी साडेसात वाजता या रनला महापौर अशोक मुर्तडक यांच्या हस्ते झेंडा दाखवून मोठ्या उत्साहात सुरुवात करण्यात आली. लहान मुलांपासून आबालवृद्धांपर्यंत विविध वयोगटातून नागरिक या रनमध्ये सहभागी झाले होते. शहरातील विविध शाळा तसेच महाविद्यालयातील विद्यार्थी, औद्योगिक क्षेत्रातील अधिकारी आणि कर्मचारी वर्ग, महिला यांच्यासह विशेष विद्यार्थी आणि नागरिकांनी या रनमध्ये सहभाग नोंदवला होता.
महात्मानगर मैदानापासून सुरू झालेल्या या रनमध्ये सर्वसामान्यांसाठी ४.५ कि.मी., लहान मुलांसाठी २.५ कि.मी. आणि विशेष नागरिकांसाठीचा मार्ग असे तीन प्रकारचे मार्ग निश्चित करण्यात आले होते. महात्मानगर मैदान, पारिजातनगर, भोसला महाविद्यालय, जेहान सर्कल, स्वामी समर्थ मंदिर चौक, कृषीनगर, समर्थनगर आणि पारिजातनगर मार्गे पुन्हा महात्मानगर मैदान येथे या रनचा समारोप करण्यात आला. यावर्षी घेण्यात आलेल्या नाशिक रनचे हे पंधरावे वर्ष होते. कुठल्याही प्रकारची स्पर्धा नसलेल्या या रनमध्ये केवळ सामाजिक दायित्व या हेतूने विक्री झालेल्या टी शर्टमधून संकलित झालेला निधी सामाजिक कार्यासाठी वापरण्यात येणार असल्याचे नाशिकरनच्या वतीने सांगण्यात आले. रन पूर्ण झाल्यानंतर या उपक्रमात सहभागी झालेल्या नागरिकांनी जमा केलेल्या कूपनची सोडत काढण्यात आली आणि सोडतीतून १४ भाग्यवंत नागरिकांना आकर्षक पारितोषिक देऊन सन्मानित करण्यात आले. तसेच नाशिक रनचे हस्तांतरण नाशिक रनचे अध्यक्ष एच. एस. बॅनर्जी यांनी टीडीके इपकॉसकडून बॉशच्या एच. बी. थॉन्टेश यांच्याकडे सुपूर्द केले.
आंतरराष्ट्रीय धावपटू तसेच आॅलिम्पिक स्पर्धेत भारताचे प्रतिनिधित्व करणारी धावपटू कविता राऊत, मोनिका आथरे, ताई बामणे, प्रशिक्षक विजेंदर सिंग यांच्या हस्ते क्रीडाज्योत प्रज्वलित करून या रनचे उद्घाटन करण्यात आले. यावेळी व्यासपीठावर महापौर अशोक मुर्तडक, पोलीस आयुक्त डॉ. रवींद्रकुमार सिंगल, नाशिक रनचे संस्थापकीय विश्वस्त आणि बॉश इंडियाचे व्यवस्थापकीय संचालक सौमित्र भट्टाचार्य, बॉश इंडियाचे कार्यकारी संचालक अ‍ॅण्ड्रेस वोल्फ, नाशिक रनचे संस्थापकीय विश्वस्त आणि टीडीके इपकॉसचे व्यवस्थापकीय संचालक एन. बालाकृष्णन, नाशिक रनचे माजी विश्वस्त एस. एम. हेगडे, बॉश इंडिया डिझेल सिस्टमचे श्रीनिवास कु मार, नाशिक रनचे अध्यक्ष आणि टीडीके इपकॉसचे कार्यकारी अध्यक्ष एच. एस. बॅनर्जी, नाशिक रनचे उपाध्यक्ष आणि बॉश नाशिकचे एच. बी. थॉन्टेश, नाशिक रनचे उपाध्यक्ष आणि बॉश नाशिकचे उपाध्यक्ष अविनाश चिंतावर, बॉशचे मनुष्यबळ महाव्यवस्थापक मुकुंद भट, नाशिक रनचे सचिव आणि टीडीके इप्कॉसचे वरिष्ठ मनुष्यबळ व्यवस्थापक अनिल दैठणकर, नाशिक रनचे खजिनदार राजाराम कासार, विश्वस्त सुधीर येवलेकर आदि उपस्थित होते. सूत्रसंचालन अतुल नारंग आणि शिल्पा भेंडे यांनी केले. (प्रतिनिधी)‘