महाजनांनी बस थांबवली अन् उपमहापौर बदलला; शिंदेसेनेला उपमहापौरपद देऊन भाजपाची खेळी

नगरसेवकांना घेऊन वायनरीतून बस निघाल्या आणि त्या गेट बाहेर निघाल्या असतानाच मंत्री गिरीश महाजन यांनी बस थांबवल्या. बसमध्ये जाऊन त्यांनी उपमहापौरपदाचा उमेदवार बदलून शिंदेसेनेला उमेदवारी दिली जाईल असे सांगितले.

नाशिक : महापौरपदासाठी हिमगौरी आडके तर उपमहापौरपदासाठी माजी आमदार बाळासाहेब सानप यांचे पुत्र मच्छिंद्र यांची उमेदवारी घोषित झालेली, गटनेते शाम बडोदे यांच्या हस्ते गुरुवारी (दि.५) रात्री कॅम्पमध्ये व्हिप बजावलेला, सकाळी दहा वाजेच्या सुमारास सहलीवरील नगरसेवकांच्या बस भरल्या आणि ते निघाले तोच भाजप नेते आणि जलसंपदा मंत्री गिरीश महाजन यांनी मोटारी थांबवल्या, उपमहापौरपद शिंदेसेनेला जाणार असल्याचा निरोप दिला आणि नाट्यमय कलाटणी मिळाली.

सर्वांना सभागृहात पोहोचताना विलास शिंदे यांना उमेदवारी घोषित केल्याचे कळले. नाशिक महापालिकेच्या महापौरपदाची निवडणूक अंतिम क्षणी उपमहापौरपदाच्या नाट्यमय घडामोडींनी मुंबईत मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यात नाशिकमध्ये सत्तेतील सहभागाबाबत चर्चा सुरू होत्या. शिंदेसेनेने महापौरपदावर नसला तरी उपमहापौरपदासाठी दावा सांगून विलास शिंदे, प्रवीण तिदमे आणि राहुल दिवे यांनी अर्ज दाखल करून ठेवले होते.

भाजपचे सर्व नगरसेवक गुरुवारी सायंकाळी भाजपच्या नगरसेवकांना पक्षाचे गटनेते अॅड. शाम बडोदे यांनी हिमगौरी आडके आणि मच्छिंद्र सानप यांना मतदान करण्याचा व्हिप बजावला होता. दरम्यान, शुक्रवारी (दि.६) सकाळी शिंदेसेनेला सत्तेच्या सोबत घेण्याचा निर्णय झाल्याची चर्चा सुरू झाली. सकाळी नगरसेवकांना घेऊन वायनरीतून बस निघाल्या आणि त्या गेट बाहेर निघाल्या असतानाच मंत्री गिरीश महाजन यांनी बस थांबवल्या. बसमध्ये जाऊन त्यांनी उपमहापौरपदाचा उमेदवार बदलून शिंदेसेनेला उमेदवारी दिली जाईल असे सांगितले. अर्थात, सभागृहात पोहोचल्यानंतर नगरसेवकांना विलास शिंदे हे उमेदवार असतील असे कळले.

शहराच्या विकासासाठी १०० दिवस दौरा - आडके

शहराच्या विकासासाठी १०० दिवसांचा विशेष कार्यक्रम आखण्यात येणार आहे. त्यात प्रत्येक प्रभागात त्या परिसरातील आमदार, नगरसेवक, महापालिकेचे अधिकारी यांना बरोबर घेऊन पाहणी करून, तेथील समस्या जाणून घेणार असल्याची माहिती पहिल्याच पत्रकार परिषदेत महापौर हिमगौरी आडके यांनी दिली. यावेळी आडके म्हणाल्या, कुंभमेळ्यासाठी सर्वजण एकत्रित काम करणार आहे. शहराच्या विकासाबरोबरच कुंभमेळाही यशस्वीरीत्या पार पाडण्याचे आपल्यासमोर महत्त्वाचे काम आहे. 

नाशिक ही पुण्यनगरी आहे. मला ही संधी नसून सेवेची पर्वणी मिळाली आहे. प्रत्येक घरात राम पोहोचवायचा आहे. त्यात नाशिककरांचा सहभाग अत्यंत महत्त्वाचा आहे. कामातून ताकद, निष्ठा व विकास घडवायचा आहे. विरोधी नेत्यांनाही हीच अपेक्षा आहे. प्रभाग निधीबरोबरच शासनाकडून वेगवेगळ्या योजनांसाठी जास्तीत जास्त निधी आणण्याचा माझा प्रयत्न राहील.

शहराचा मजबूत पाया तयार करू - विलास शिंदे

कुंभमेळ्याच्या निमित्ताने आता शहराचा जास्तीत जास्त विकास करायचा आहे. पक्षाचे नेते तथा उपमुख्यमंत्री एकनाथ शिंदे व शिक्षणमंत्री दादा भुसे यांनी उपमहापौरपदासाठी दिलेली संधी माझ्यासाठी महत्त्वाची आहे. या संधीचे नक्कीच सोने करून दाखवीन, असा विश्वास उपमहापौर विलास शिंदे यांनी व्यक्त केला. पायाभूत सुविधा, रस्ते, स्वच्छता, पाणीपुरवठा, वाहतूक व्यवस्था, तसेच भाविकांसाठी मूलभूत सोयी-सुविधा सक्षम करण्यावर विशेष भर देण्यात येणार आहे. 

कुंभमेळ्याच्या निमित्ताने शहराचा केवळ तात्पुरता नव्हे, तर दीर्घकालीन विकास साधण्याचा आमचा ठाम संकल्प आहे. कुंभमेळ्यामुळे शहराची ओळख राष्ट्रीय आणि आंतरराष्ट्रीय पातळीवर निर्माण होणार असून, या संधीचा उपयोग शहराच्या भविष्याचा मजबूत पाया घालण्यासाठी केला जाईल. या मिळालेल्या संधीचे नक्कीच सोने करून दाखवेन, असा ठाम विश्वास शिंदे यांनी व्यक्त केला.