चांदवडला शिरीषकुमार कोतवाल समर्थकांची बैठक

चांदवडला शिरीषकुमार कोतवाल समर्थकांची बैठक

चांदवड : गेल्या आठवड्यातमुख्यमंत्री पृथ्वीराज चव्हाण यांनी मला कॉँग्रेस पक्षात प्रवेश करा, असा आग्रह केला; मात्र मी माझ्या चांदवड-देवळा मतदारसंघातील मित्र-कार्यकर्त्यांशी चर्चा केल्याशिवाय मी प्रवेश करणार नाही. कारण गेल्या ३३ वर्षांपासून माझ्यावर मतदारांनी व कार्यकर्त्यांनी जे प्रेम केले त्यांना मी विसरू शकणार नाही, असे भावपूर्ण आवाहन चांदवड - देवळा मतदारसंघाचे आमदार शिरीषकुमार कोतवाल यांनी चांदवड येथे विधानसभा निवडणुकीचे कार्यकर्त्यांचे मनोगत व पुढील धोरण ठरविण्यासाठी आयोजित बैठकीत केले.बैठकीच्या अध्यक्षस्थानी ज्येष्ठ नेते अ‍ॅड. पोपटराव पवार होते, तर प्रमुख मार्गदर्शक म्हणून माजी आमदार शांतारामातात्या अहेर, कृउबा समिती संचालक संजय जाधव, अ‍ॅड. विनायक घुले, दिलीप धारराव, बबनराव पूरकर, शंकरराव गांगुर्डे, पोपटराव उशीर, डॉ. विश्राम निकम, गणेश ठाकरे, प्रा.राजेंद्र सोमवंशी, हरिभाऊ शिंदे (हिवरखेडे), वाघचौरे, (तळेगावरोही) शरद गाढे, विनोद माळी, अशोक व्यवहारे, सरपंच विजय कोतवाल, जितेंद्र अहेर, विजय पगार आदिंची भाषणे झालीत. यावेळी बोलताना आमदार कोतवाल म्हणाले की, जनतेने दिलेले प्रेम व पाच वर्षात केलेली महत्त्वपूर्ण विकासकामे तसेच आघाडी सरकारने घेतलेले निर्णय यात मतदारसंघातील कांदा, डाळींब, टमाटा पिकांसाठी शेतकऱ्यांना न्याय या शासनाने दिला तर शेतकऱ्यांना कमी व्याजदराने कर्जपुरवठा, वीजप्रश्नी ठोस निर्णय, सिंचनाचे प्रश्न, चांदवड - देवळा मतदारसंघात ग्रामपंचायतीना इमारती, स्मशानभूमीचा प्रश्न आदि महत्त्वाचे प्रश्न मार्गी लावले आहेत. अजूनही बरेच प्रश्न मार्गी लावायची आहेत. या करिता जनतेचे व कार्यकर्त्यांचे सहकार्य अपेक्षित आहेत. आतापर्यंत काही लोकांना भरपूर देऊनही ते काहीच मिळाले नाही असे म्हणून जर शेवटच्या क्षणी साथ सोडणार असेल तर हे बरोबर नाही. तडजोड विचाराशी करू नका तर बांधलकीशी तडजोड करा, असे सांगून माझ्या मनगटात धमक आहे व डोक्यात अक्कल आहे. याकरिता मला चांदवड मतदारसंघातील शेवटच्या माणसापर्यंत विकास पोहोचवायचा आहे, तर कोतवाल म्हणाले की, माझ्यापेक्षा आपणापैकी जर कोणी सक्षम उमेदवार असला तर मी थांबण्यास तयार आहे. त्याच्यासाठी मी तन-मन-धनाने प्रयत्न करीन हे कोतवाल बोलताच उपस्थितांनी सांगितले की, भाऊ तुम्हीच उभे रहा, असे सांगताच कोतवाल म्हणाले की, तुमच्या विश्वासावर मी उभा राहणार आहे व पुढे जाणार आहे. आपण यासंदर्भात मतदारसंघातील मोठ्या गावातील कार्यकर्त्यांशी चर्चा करून निर्णय घेणार असल्याचे आमदार कोतवाल यांनी सांगितले.बैठकीस माजी सभापती रामदास कोल्हे, चंद्रभान भालेराव, अशोक जाधव, अ‍ॅड. दिनकरराव ठाकरे, राजेंद्र गिडगे, मारुती भोकनळ, शिवाजी जाधव, मुन्नुभाई घासी, आझादभाई, चंद्रशेखर कासलीवाल, गुल्लुभाई घासी, अन्वर शहा, अशपाक खान, दीपक व्यवहारे, विजय सांबर, भाऊसाहेब शेलार, लक्ष्मण भुजार्डे, शिवाजी कासव, पोपटराव पगार, मनोहर पाटोळे, शांताराम घुले, सचिन अग्रवाल, मधुकर निंबाळकर, पुंजाराम ठाकरे, डॉ. संजय कोकणे, डॉ. संदीप देवरे, दिनकर कोतवाल, पोपटराव शेळके, उद्धव चौधरी, सुधाकर निकम, प्रकाश जैन, खंडेराव सोमवंशी, शिवाजी बर्डे आदिंसह चांदवड- देवळा मतदारसंघातील प्रमुख कार्यकर्ते उपस्थित होते. (* वार्ताहर)