माजी जिल्हा परिषद अध्यक्ष शिवबंधनात?

दळवट येथे गुफ्तगू : शिवसेनेच्या जिल्हाप्रमुखांनी दिला दुजोरा

 नाशिक : नव्वदच्या दशकामध्ये जिल्हा परिषदेची सत्ता स्वबळावर मिळविणाऱ्या शिवसेनेने पुन्हा त्यासाठी कंबर कसून प्रयत्न सुरू केले असून, याच प्रयत्नांचा एक भाग म्हणून जिल्हा परिषदेच्या माजी महिला अध्यक्ष आणि जिल्हा परिषद सदस्य असलेले त्यांचे पती यांना आपल्या पक्षात आणण्याचे प्रयत्न सुरू असल्याचे समजते. त्याबाबत कळवण तालुक्यातील दळवट येथे चर्चा झाल्याच्या वृत्तास शिवसेनेच्या जिल्हाप्रमुखांनी दुजोरा दिला आहे.केंद्रात व राज्यात भाजपाबरोबर शिवसेना सत्तेत असली तरी स्थानिक स्वराज्य संस्थांच्या निवडणुकीत हे दोन्ही पक्ष स्वबळावर लढण्याच्या हालचाली आहेत. त्यात नाशिक जिल्हा परिषदेवर शिवसेनेचा भगवा फडकविण्याच्या दृष्टीने व्यूहरचना केली जात असून, जिल्ह्यातील अधिकाधिक मातब्बरांना पक्षात आणण्याचे प्रयत्न सुरू आहेत. त्या अंतर्गत जिल्हा परिषदेच्या माजी अध्यक्षाला गळास लावण्याचे प्रयत्न केले जात आहे.जिल्हा परिषदेच्या या माजी अध्यक्षांचे श्वसूर हे काही वर्षांपूर्वी भाजपाचे आमदार तसेच मंत्रीही होते. या आधीही त्यांनी विविध पक्षांमध्ये प्रवेश केलेला आहे. शिवसेनेतील नेते व कार्यकर्त्यांशी त्यांचे मित्रत्वाचे संबंध असल्यामुळे त्याचा फायदाही या दांपत्याला होण्याची अपेक्षा आहे.(वार्ताहर)