शाश्वत स्वच्छतेवर नंदुरबारात कार्यशाळा
By लोकमत न्यूज नेटवर्क | Published: January 22, 2021 04:29 AM2021-01-22T04:29:05+5:302021-01-22T04:29:05+5:30
नंदुरबार येथील हिरा एक्झिक्युटिव्ह येथे सरपंच, ग्रामसेवक व स्वच्छाग्रही यांच्यासाठी आयोजित प्रशिक्षण कार्यक्रमाच्या उद्घाटनप्रसंगी डॉ. फडोळ बोलत होत्या. त्या ...
नंदुरबार येथील हिरा एक्झिक्युटिव्ह येथे सरपंच, ग्रामसेवक व स्वच्छाग्रही यांच्यासाठी आयोजित प्रशिक्षण कार्यक्रमाच्या उद्घाटनप्रसंगी डॉ. फडोळ बोलत होत्या. त्या म्हणाल्या, शाश्वत स्वच्छता राहावी यासाठी नंदुरबार तालुक्यात फिनिश सोसायटी मार्फत ५१ ग्रामपंचायतीअंतर्गत विविध उपक्रमांचे आयोजन केले जात आहे. यामुळे आपल्या ग्रामपंचायत अंतर्गत शाश्वत स्वच्छता राखण्यासाठी संधी निर्माण झाली असून या संधीचे सोने करावे. गावे स्वच्छतेच्या बाबतीत स्वयंपूर्ण करून गावाचा लौकिक वाढवावा. यात आपली भूमिका महत्त्वाची राहणार असल्याचे प्रतिपादन यावेळी डॉ. फडोळ यांनी केले.
स्वच्छ भारत मिशन ,ग्रामीण पंचायत समिती ,नंदुरबार, एन.एस.ई . फाऊंडेशनअंतर्गत फिनिश सोसायटी यांच्या संयुक्त विद्यमाने नंदुरबार तालुक्यातील निवडक ग्रामपंचायतीतील सरपंच, ग्रामसेवक व स्वच्छाग्रही यांच्यासाठी हागणदारीमुक्तीवर आधारित प्रशिक्षकांचे पाच दिवसीय प्रशिक्षणाचे आयोजन केले आहे. जिल्हा परिषदेच्या अध्यक्षा ॲड. सीमा वळवी, मुख्य कार्यकारी अधिकारी रघुनाथ गावडे व उपमुख्य कार्यकारी अधिकारी (पाणी व स्वच्छता) डॉ. वर्षा फडोळ, गटविकास अधिकारी अशोक पटाईत, फिनिश सोसायटीचे प्रकल्प संचालक अभिषेक चौधरी यांच्या मार्गदर्शनाखाली या प्रशिक्षणाचे आयोजन करण्यात आले आले आहे.
प्रशिक्षणाचे उद्घाटन उपमुख्य कार्यकारी अधिकारी डॉ. वर्षा फडोळ, गटविकास अधिकारी अशोक पटाईत, मुख्य प्रशिक्षक शिवकुमार शर्मा यांच्या हस्ते करण्यात आले. यावेळी विस्तार अधिकारी भैय्यासाहेब निकुंभ, एन. डी. पाटील, प्रकल्प व्यवस्थापक आकांक्षा बोरकर, अभिजित मैंदाड, निशांक गजभिये आदी उपस्थित होते
प्रास्ताविक मंगेश निकम यांनी केले. पाच दिवसीय या प्रशिक्षणात स्वच्छतेसाठी वर्तणूक बदलाची आवश्यकता का आहे, शौचालयाची नियमित देखभाल व दुरुस्ती, घनकचरा व सांडपाणी यांचे व्यवस्थापन, अस्वच्छता यामुळे होणारे विविध आजार, शाश्वत स्वच्छतेसाठी उपलब्ध असलेले विविध तांत्रिक पर्याय याविषयी मार्गदर्शन करण्यात येणार आहे तसेच शाश्वत स्वच्छता कशी राखावी, यासाठी क्षेत्रभेटीद्वारे उपस्थितांना मार्गदर्शन करण्यात येणार आहे.