शेतकरी करताहेत पाण्याची मागणी
नंदुरबार : तालुक्यातील विविध भागात उन्हाळी पिकांसाठी जलसंपदा विभागाने पाणी देण्याची मागणी होत आहे. जिल्ह्यातील काही प्रकल्पातून पाटाद्वारे तसेच माेटारी टाकून पाणी उचलणे शक्य आहे. या भागातील शेतकरी सध्या विभागाकडे अर्ज करुन पाठपुरावा करत आहेत.
प्राथमिक आरोग्य केंद्रातील झाड तोडले
नंदुरबार : तालुक्यातील आष्टे प्राथमिक आरोग्य केंद्रात सध्या बांधकाम सुरु आहे. शासनाकडून ठेकेदार नियुक्त करुन इमारत व निवासस्थानांचे बांधकाम सुरु असल्याचे सांगण्यात येत आहे. दरम्यान संबंधित ठेकेदाराने येथील डेरेदार असा वृक्ष तोडून टाकल्याची माहिती समाेर आली आहे. हा वृक्ष तोडल्यानंतर त्याठिकाणी किमान पाच झाडे लावण्याची अपेक्षा असतानाही कार्यवाही झालेली नसल्याचे सांगण्यात येत आहे.
हिंस्त्र प्राण्यांचा संचार
बोरद : तळोदा तालुक्यातील बोरद परिसरात पुन्हा बिबट्या दिसून आल्याचे सांगण्यात येत आहे. या भागातील शेतशिवारात हा बिबट्या दिसून आल्याने चिंता वाढल्या आहेत. उन्हाळा सुरु झाल्याने वन्यप्राणी वनातून शेतशिवारातील पाणीसाठ्यांकडे धाव घेत असल्याचे शेतकऱ्यांचे म्हणणे आहे.
टरबूजांची तोडणी
रांझणी : तळोदा तालुक्यातील विविध भागात लागवड करण्यात आलेल्या टरबुजांची तोडणी सुरु झाली आहे. शेतकऱ्यांनी तीन महिन्यांपूर्वी लागवडीला सुरुवात करत पिकांचे संगोपन केले होते. यातून सर्वच ठिकाणी चांगले पीक आल्याने तोडणी सुरु झाली आहे. व्यापारी बांधावर खरेदी करत आहेत.
आवास योजनेच्या लाभार्थींना अडचणी
नंदुरबार : जिल्ह्यातील प्रधानमंत्री आवास योजनेंतर्गत मंजूर घरकुलांचे हप्ते वेळेवर मिळत नसल्याने लाभार्थी त्रस्त आहेत. यातही काही लाभार्थींना ग्रामसभेने ठराव देऊनही त्यांची नावे अद्याप यादीत आलेली नसल्याचे सांगण्यात येत आहे. यामुळे अनेकांनी सुरु केलेेली घरांची कामे थांबली आहे. नंदुरबार, शहादा व धडगाव तालुक्यात या अडचणी अधिक असल्याचे सांगण्यात आले आहे.
पेट्रोल चोरट्यांवर लक्ष देण्याची गरज
नंदुरबार : एकीकडे पेट्रोलचे दर वाढल्याने दुसरीकडे पेट्रोल चोरीचेही प्रकार होत आहेत. शहरातील अनेक ठिकाणी रात्रीच्या वेळी पेट्रोल चोरी झाल्याचे समोर आले आहे. शहरासोबतच लगतच्या वाघोदा, पातोंडा, होळ तर्फे हवेली शिवार आणि दुधाळे शिवारातील वसाहतींमधून दुचाकींमधून पेट्रोल लांबवण्याचे प्रकार घडत असल्याची माहिती देण्यात येत आहे.
बसफेऱ्या वाढवा
शहादा : धडगाव येथून शहादा बस फेऱ्यांमध्ये वाढ करण्याची अपेक्षा व्यक्त होत आहे. दुपारच्या वेळी बसेस नसल्याने प्रवासी ताटकळून असतात. यातून कामानिमित्त धडगावकडे जाणाऱ्यांचे हाल होत असल्याची माहिती देण्यात आली आहे. बसेस वाढल्यास प्रवासी संख्या वाढणार आहे.
कांदा आवक वाढली
नंदुरबार : बाजार समितीच्या मार्केट यार्डात कांदा आवक वाढली आहे. ग्रामीण भागात पांढरा कांदाही विक्रीसाठी आणला जात असल्याचे दिसून आले आहे. काही दिवसांपूर्वी येणारा खराब आणि छोटा कांदा बाजारात आणणे बंद झाले असून चांगल्या दर्जाचा कांदा येत असल्याने समाधान व्यक्त होत आहे.
चारा साठवण
धडगाव : दुर्गम भागात उन्हाळ्याची चाहूल लागल्याने चारा साठवण करण्याची तयारी सुरु झाली आहे. घरोघरी कापण्यात आलेला ज्वारीचा कडबा झोपडीसारखा उंचावर रचून त्याचा साठा केला जाता. उन्हाळ्यात हिरवा चारा कमी झाल्यानंतर गुरांना कोरडा कडबा देत त्यांचे संगोपन करण्यात येते.
स्वच्छतेची मागणी
अक्कलकुवा : शहरातील विविध भागात कचरा पडून आहे. यामुळे येणाऱ्या दुर्गंधीने नागरिक त्रस्त आहेत. शहरातील बाजारपेठ व शाळांच्या आसपासही कचरा पडून आहे. संबधित विभागाने याकडे गांभीर्याने लक्ष देत कारवाई करण्याची अपेक्षा व्यक्त करण्यात येत आहे.