लोकमत न्यूज नेटवर्क
बामखेडा : शहादा तालुक्यातील बामखेडा त.त., येथील कोरोनाचा संसर्ग झालेल्या रुग्णाचा दुसरा अहवाल निगेटीव्ह आल्याने त्याला नाशिक येथून शहादा येथील विलगीकरण कक्षात गुरुवारी दाखल करण्यात आले. तसेच या रुग्णाच्या निकटच्या संपर्कातील २७ लोकांना शहादा येथील मोहिदा रस्त्यावरील विलगीकरण कक्षात ठेवण्यात आले होते. त्यातील रुग्णाच्या कुटुंबातील सर्व व्यक्तींचे अहवाल निगेटिव्ह आल्यानंतर त्यांचीही गुरुवारी घरवापसी झाली.
सरपंच लीना चौधरी, पोलीस पाटील डॉ.योगेश चौधरी, ग्रामविकास अधिकारी पी.व्ही. बाविस्कर, आरोग्य सेविका अलका मराठे, मनोज चौधरी, संगणक चालक कैलास गवळे, प्रल्हाद कुलथे, अंगणवाडी सेविका, आशा कार्यकर्ती या रुग्णाच्या कुटुंबाच्या स्वागतासाठी उपस्थित होते. या कुटुंबाला प्रशासनातर्फे पुढील आठवडाभर होम क्वारंटाईन करण्याच्या सूचना देण्यात आल्या. बामखेडा येथील रुग्णावर नाशिक येथील खाजगी दवाखान्यात दुसऱ्या आजारावर उपचार सुरू असताना त्याची कोरोना चाचणीही घेण्यात आली. त्यात त्याचा अहवाल पॉझिटीव्ह आला होता. त्यामुळे या रुग्णाच्या संपर्कात आलेल्यांची आरोग्य विभागातर्फे तपासणी करण्यात आली होती. आधी १६ जणांच्या स्वॅबचे नमुने तपासणीसाठी पाठवण्यात आले होते. त्यापैकी कुटुंबातील ११ जणांचे अहवाल निगेटीव्ह आले होते. नंतर त्यामधील तीन डॉक्टर व दोन चालक असे उर्वरित लोकांचे स्वॅब घेण्यात आले होते. त्यांचेही अहवाल निगेटव्ही आले आहेत. परंतु अजून एक किंवा दोन दिवस त्यांना शहादा येथील विलगीकरण कक्षात ठेवण्यात येणार आहे, असे समजते.
कोरोना रुग्णाची जिल्हावापसी
बामखेडा येथील एका ४५ वर्षीय व्यक्तीला नाशिक येथे उपचारादरम्यान कोरोनाची लागण झाल्याचा अहवाल प्रशासनास प्राप्त झाला होता. त्यानंतर नाशिक येथील खाजगी दवाखान्यात कोरोनाचे उपचार सुरु होते. त्यांचा दुसरा अहवाल निगेटीव्ह आल्याने त्यांना डिस्चार्ज देण्यात आला. गुरुवारी सकाळी या रुग्णाला शहादा येथील विलगीकरण कक्षात भरती करण्यात आले. पुढील आठवडाभर तेथेच त्यांच्यावर उपचार सुरु राहतील, अशी माहिती प्रशासनामार्फत देण्यात आली.
बामखेडा त.त., ता.शहादा येथे गेल्या पाच दिवसांपासून सर्व गाव लॉकडाउन होते. परंतु सर्व व्यक्तींचे नमुने हे निगेटीव्ह आल्याने गावात काहीअंशी चिंतेचे वातावरण कमी झाले आहे. त्यामुळे गावातील किराणा दुकान, बँक, शासकीय-निमशासकीय कार्यालये, शेती कामे आदी सर्व सोशल डिस्टस्टिंगचे पालन करीत सुरळीत सुरु करण्यात आली.