सोमावल येथे लसीकरण शिबिर

या वेळी सोमावल प्राथमिक आरोग्य केंद्राचे कर्मचारी दिवसभर जि.प. शाळेच्या आवारात थांबून होते. मात्र, आरोग्य कर्मचारी व डॉक्टर्स लसीकरणासाठी गावात आल्याची माहिती मिळताच बहुतेक ग्रामस्थ शेतात शेतीकामे करण्याचा बहाणा करून निघून गेले. या वेळी काही ग्रामस्थांनी लसीकरणासाठी हमीचा स्टॅम्प लिहून द्यावा, अशी मागणी केली तर काही वयोवृद्धांनी ‘मेलो तरी चालेल पण लसीकरण करणार नाही’ अशी भूमिका घेतली. या वेळी सामाजिक कार्यकर्ते गणपत पाडवी यांनी इतरांनाही प्रोत्साहन देत लसीकरण करून घेतले. प्रशासन व आरोग्य विभागाने चालवलेल्या लसीकरणाच्या जनजागृतीला ग्रामीण भागात संमिश्र प्रतिसाद मिळत असल्याची परिस्थिती आहे. लसीकरणासाठी सोमावल प्राथमिक आरोग्य केंद्राचे वैद्यकीय अधिकारी डॉ. सुधीर ठाकरे, समुदाय आरोग्य अधिकारी डॉ. हर्षदा चौधरी, पर्यवेक्षक एस.ए. ठाकरे, आरोग्यसेविका जयश्री वसावे, जि.प. शाळेचे मुख्याध्यापक दिनेश मोरे, शिक्षिका रंजना वळवी यांच्यासह आरोग्य विभागाचे कर्मचारी उपस्थित होते.