कोरोना महामारीच्या पार्श्वभूमीवर गेल्या दीड वर्षापासून मुलांचे शिक्षण थांबलेले आहे. या बाबीचे गांभीर्य लक्षात घेता काही शिक्षणप्रेमींनी मुलांच्या शिकण्यासाठीचा हा अभिनव उपक्रम शोधून काढला व त्या उपक्रमाची अतिदुर्गम नक्षलग्रस्त भागातील मुलांच्या शिकण्यासाठीही सुरुवात केलेली आहे. या आवाहनाला गावकऱ्यांनी उत्स्फूर्त प्रतिसाद दिला आहे व गल्ली-चौकातील मुलांचे शिकणे व खेळणे प्रभावी होण्यासाठी मदतीचा हात दिला आहे.
‘सामाजिक देणं’ या भावनेने दुर्गम भागात मुलांसाठी काहीतरी ठोस करावे या विचाराने समविचारी गटातील धीरज खैरनार, संदीप पाटील व ललिता भामरे यांनी काकडदा, ता.धडगाव येथील रमेश मोरे यांच्या मदतीने गावातील मुले ज्या ज्या ठिकाणी खेळण्यासाठी, गप्पांसाठी जमतात अशा चार ठिकाणांची निश्चिती केली. या चार ठिकाणांसाठी गावातील जबाबदार व्यक्तींनी परवानगी दिली आणि रंगकामास सुरुवात झाली. मुले स्वतः शिकू शकतील अशा गोष्टी रंगकामातून भिंतींवर साकारल्या गेल्या. यात भाषा, गणित आणि इंग्रजी विषयाच्या प्रारंभिक शिक्षणापासून चौथ्या वर्गाच्या स्तरापर्यंतच्या बाबींचा समावेश आहे. यातून मुलेच एकमेकांच्या मदतीने शिकू शकतील असा आशय भिंतींवर आहे.
इतकेच न होता ते शिकणे कसे होईल? यासाठी मुलांसमवेत या गटाने गावाच्या शाळेचे शिक्षक, पालक व मुले यांच्या सोबत त्या गोष्टी कशा वापराव्यात याबाबत प्रत्यक्ष मुलांच्या सहभागाने समजावले. मुलांना मदत करण्यासाठी या चार ठिकाणी गावातील निवडक तरुण व शिक्षक यांनी मदतीची जबाबदारी स्वीकारली आहे.
या संपूर्ण प्रकियेत शिक्षकांच्या या गटास काकडदा येथील शिक्षणप्रेमी आमशा पाडवी, पोलीस पाटील गुंजाऱ्या पाडवी, रमेश मोरे, केंद्रप्रमुख नरेंद्र महिरे आणि शाळेतील शिक्षक प्रवीण भामरे, संजीव धनगर व सुभाष पावरा यांचे सहकार्य लाभले.
मुलांच्या शिक्षणात प्रत्यक्ष मदत करण्यासाठी शिवदास पाडवी, किसन पाडवी, चंद्रसिंग पावरा व शिवानी पाडवी अशा पालकांचा महत्त्वपूर्ण सहभाग लाभत आहे आणि पुढेदेखील मुलांच्या शिक्षणाचे हे काम सगळ्यांमार्फत सुरू राहणार आहे.