दरम्यान, शाळांना दीर्घ सुट्या असल्याने शिक्षकांनी वेळेचा सदुपयोग करून घेत गावांमध्ये नागरिकांचे उद्बोधन करणे, लसीकरणसंदर्भात समज-गैरसमज दूर करणे, लसीकरणाचे महत्त्व समजावून सांगणे, लसीकरणासंदर्भात ऑडिओ व व्हिडीओ क्लिपद्वारे जनजागृती करण्याचे आवाहन करण्यात आले. शून्य नोंदणी असलेल्या, नोंदणी अथवा लसीकरण असलेल्या ठिकाणी केंद्रप्रमुखांनी कामाचे सूक्ष्म नियोजन करून वेळापत्रक तयार करावे. सरपंच, तलाठी, ग्रामसेवक, आशावर्कर तसेच ग्रामपंचायत सदस्य, पोलीस पाटील आणि गावातील ज्येष्ठ नागरिक यांच्या मदतीने ग्रामस्थांना लसीकरणासाठी तयार करून लसीकरणाचे उद्दिष्ट पूर्ण करण्याच्या सूचनाही यावेळी करण्यात आल्या.
माध्यमिक शिक्षणाधिकारी कदम यांनी प्राथमिक व माध्यमिक शाळांमधील सर्व शिक्षकांनी याबाबत पुढाकार घेऊन कार्यक्षेत्रातील गावांमधील लसीकरणाबाबत जाणीव जागृती करण्याचे सांगितले. मुख्य कार्यकारी अधिकारी रघुनाथ गावडे यांनी उपस्थितांच्या अडचणी समजून घेतल्या. यावेळी त्यांनी सांगितले की, प्राथमिक व माध्यमिक शिक्षकांच्या रूपाने मनुष्यबळ उपलब्ध आहे. त्यांनी प्रत्यक्ष गावांत उपस्थित राहून काम केल्यास लसीकरण सहजपणे पूर्ण करता येईल. त्यादृष्टीने सर्वांनी प्रयत्न करणे गरजेचे आहे. उपशिक्षणाधिकारी भानुदास रोकडे यांनी आभार मानले.