तापी जिल्ह्यातील उच्छल पोलिसांनी महाराष्ट्र-गुजरात सीमावर्ती भागातील तपासणी नाक्यावर आरोग्य विभाग व पोलीस दलाचे पथक कार्यरत करण्यात आले आहेत. महाराष्ट्रातून गुजरात राज्यात येणाऱ्या प्रत्येक वाहनचालकांची तपासणी सुरू करण्याचे आदेश आरोग्य विभाग व पोलिस दलाला देण्यात आले आहे. नवापूर, तळोदा, अक्कलकुवा या सीमावर्ती भागात गुजरात पोलिसांनी कडक नाकाबंदी केली आहे. याठिकाणी आरोग्य पथकामार्फत तपासणी करून रिपोर्ट निगेटिव्ह असल्यास गुजरात राज्यात प्रवेश दिला जात आहे. रिपोर्ट नसल्यास परतीचा प्रवास करावा लागत आहे. निझर येथे तात्काळ रॅपिड टेस्ट करून गुजरात राज्यात जाऊ दिले जात आहे. गुजरात राज्यातील आरोग्य पथक २४ तास सीमावर्ती भागात वाहन चालकाची थर्मल स्कॅनिंग, कोरोना रिपोर्ट पॉझिटिव्ह आहे की निगेटिव्ह याची तपासणी करीत आहे.
तोंडाला मास्क नसल्यास गुजरात पोलीस एक हजार रूपयांचा दंड महामार्गावर वसूल करीत आहे. गुजरात राज्यात जाण्यासाठी कोरोना रॅपिड किंवा आरटीपीसीआर तपासणी रिपोर्ट असणे गरजेचे आहे. नंदुरबार जिल्ह्यातील सीमावर्ती भागातील लोक मोठ्या संख्येने गुजरात राज्यात कोरोनाचा उपचारासाठी जात असल्याने त्यांची मोठी अडचण निर्माण झाली आहे. नवापूर सीमा तपासणी नाक्यावर रॅपिड चाचणीचे कॅम्प लावण्याची मागणी नागरिकांनी केली आहे.
शेकडो वाहने महाराष्ट्रात परत पाठविण्यात आले
बुधवारी संध्याकाळी गांधीनगरहून आरोग्य विभागाचे आदेश आल्याने आम्ही तात्काळ नवापूर-उच्छल सीमावर्ती भागात पोलिस बंदोबस्त लावून तात्काळ महाराष्ट्रातील वाहने गुजरात राज्यात जाण्यासाठी अटकाव केला. एकही वाहन आम्ही जाऊ दिले नाही. २४ तास बंदोबस्त तैनात करण्यात आला आहे. कोरोना रिपोर्ट निगेटिव्ह असल्यास गुजरात राज्यात प्रवेश दिला जातो. शेकडो वाहने महाराष्ट्र राज्यात परत पाठविण्यात आले.
-राजकुमार लोह, पोलीस उपनिरीक्षक,उच्छल पोलीस स्टेशन पोलीस
गुजरात राज्यात बंदी असल्याने कोरोना उपचार कसा घ्यावा?
जिल्ह्यातील कोरोना पॉझिटिव्ह रुग्णांची संख्या मोठ्या प्रमाणावर येत असल्याने जिल्ह्यातील सर्व सरकारी व खाजगी रूग्णालय हाऊसफुल्ल झाले आहेत. बहुतांश नागरिक चांगली आरोग्य सुविधा मिळावी म्हणून गुजरात राज्यातील सोनगड, व्यारा, बारडोली, सुरत येथे कोरोना पॉझिटिव्ह रुग्ण घेऊन जात असतात. परंतू गुजरात राज्यात कोरोना रिपोर्ट निगेटिव्ह असल्यास गुजरात राज्यात प्रवेश दिला जाईल असा आदेश आल्याने गुजरात राज्यातील कोरोना उपचार करण्यासाठी कसे जावे असा प्रश्न पडला आहे.
आड मार्गाने वाहने रवाना
धुळे-सुरत राष्ट्रीय महामार्गावर पोलीस व आरोग्य यंत्रणा कोरोना रिपोट असल्याशिवाय प्रवेश देत नसल्याने वाहन चालकांनी आडमार्गाने गुजरात राज्यात वाहने रवाना केली. काहींनी तर आपली महाराष्ट्र पासिंग ची वाहन नवापूरला लावून गुजरात राज्याचे वाहन भाड्याने करून रवाना झाले.