नवापूर शहरातील टाऊन हॉलचे कोविड सेंटर पूर्ण बंदिस्त करण्यात येत आहे. आजूबाजूच्या परिसरातील नागरिकांना त्याचा त्रास होणार नाही, याची खबरदारी घेत पूर्ण परिसर बंदिस्त करण्यात येत आहे. नवापूर तालुक्यातील खासगी कोविड सेंटरमध्ये अव्वाच्या सव्वा फी घेण्याचे थांबविण्यात यावे, अशी विनंती नागरिकांनी केली आहे.
जिल्हा शल्यचिकित्सक भोये यांची पाहणी
नवापूर शहरातील ४० बेडच्या ऑक्सिजनयुक्त कोविड सेंटरला जिल्हा शल्यचिकित्सक डॉ. रघुनाथ भोये, तहसीलदार मंदार कुलकर्णी, नवापूर उपजिल्हा रुग्णालयाचे वैद्यकीय अधीक्षिका कीर्तीलता वसावे, कोविड सेंटरचे प्रमुख डाॅ. युवराज फडके यांनी भेट देऊन पाहणी केली.
टाऊन हॉलमधील कोविड सेंटरसाठी दुरुस्ती
शहरातील टाऊन हॉलमध्ये एक मोठा हाॅल, तीन रूमस, डॉक्टर व नर्स अशी उपलब्धता करण्यात आली आहे. टाऊन हॉलमध्ये स्वच्छता करून निर्जंतुकीकरण करण्याचे काम सुरू आहे. तसेच लाइट, फॅन, संडास, बाथरूमची दुरुस्ती करीत कोविड सेंटर दोन दिवसात सुरू करण्यात येणार आहे. ऑक्सिजनसाठी पाइपलाइनचे काम सुरू करण्यात आले आहे, अशी माहिती तहसीलदार मंदार कुलकर्णी यांनी दिली.
पुरेशा संख्येत डाॅक्टर व नर्ससह आरोग्य कर्मचारी द्यावे
नवापूर शहरातील टाऊन हॉलमध्ये ४० वेळचे ऑक्सिजनयुक्त कोविड सेंटर सुरू करण्यात येत आहे. त्यासाठी लागणारे तज्ज्ञ डॉक्टर, नर्स, स्वच्छता कर्मचारी यांचीदेखील नेमणूक पुरेशा संख्येमध्ये करणे गरजेचे आहे. नवापूर शहरातील काही खासगी रुग्णालयातील तज्ज्ञ डॉक्टरांची नेमणूक करून सुसज्ज असे कोविड सेंटर सुरू व्हावे, अशी अपेक्षा नागरिकांनी केली आहे.
ग्रेस हॉस्पिटलचे कोविड सेंटर सुरू होणार
गेल्या ग्रेस हॉस्पिटल, करंजी (खुर्द), नवापूर येथे कोविड रुग्ण सेवा सुरू करण्यात आले आहे. काही कारणास्तव बंद असलेले कोविड सेंटर सुरू करण्यात येणार आहे. कोविड सेंटरसाठी आरोग्य कर्मचाऱ्यांची लवकर मानधन तत्वावर भरती करण्यात येणार आहे, असे ग्रेस हॉस्पिटलचे संचालक जोशवा पुनूस यांनी सांगितले आहे.