नंदुरबार : कोरोना संसर्ग झालेल्यांना आता म्युकरमायकोसिस या गंभीर आजाराची भीती सतावत आहे. यातून हा आजार खर्चिक असल्याने शासनाने त्याचा महात्मा फुले जनआरोग्य योजनेत समावेश करत शस्त्रक्रियेसाठी दीड लाखांपर्यंतचा खर्च माफ केला आहे. परंतु, नंदुरबार जिल्ह्यात मात्र पाचच रुग्णालयांमध्ये जनआरोग्य योजनेचा लाभ मिळत असल्याने रुग्णालयांची संख्या वाढविण्याची अपेक्षा व्यक्त होत आहे.
जिल्ह्यात गेल्या काही दिवसांपूर्वी म्युकरमायकोसिसचा रुग्ण आढळून आल्यानंतर खासगी रुग्णालयात किचकट अशी शस्त्रक्रिया करण्यात आली आहे. यामुळे जिल्ह्यात म्युकरमायकोसिसवरही उपचार मिळत असल्याचे स्पष्ट झाले आहे. परंतु, या आजारावर मात करण्यासाठी लागणारी औषधी, इंजेक्शन्स तसेच इतर संदर्भ सेवा महागडी असल्याने रुग्णांच्या नातेवाइकांची धावपळ होत आहे. एकीकडे ही धावपळ असताना म्युकरमायकोसिसबाबत गैरसमज असल्याने रुग्णांच्या कुटुंबीयांना टाळले जात आहे. परिणामी ते त्यांची नावेही सांगत नसल्याचे चित्र आहे.
जिल्हा रुग्णालयातून मोफत औषधी..
म्युकरमायकोसिस आजाराने बाधित झालेल्या रुग्णांची संख्या ही जिल्ह्यात मर्यादित आहे. आजार वाढीस लागलेल्या रुग्णांच्या जबडा किंवा दातांच्या शस्त्रक्रिया कराव्या लागत आहेत. जनआरोग्य अंतर्गत दीड लाखाचा खर्च मंजूर झाला असला तरी अद्याप नियुक्त असलेल्या पाच पैकी केवळ एका ठिकाणी सध्या म्युकरमायकोसिसच्या रुग्णांवर उपचार सुरू असल्याची माहिती आहे.
जिल्हा रुग्णालयाने गुरुवारी यासंदर्भात बैठक घेत जिल्ह्यातील म्युकरमायकोसिस बाधित रुग्णांना उपचार आणि औषधी देण्याचा निर्णय घेतला आहे. याठिकाणी उपचार घेत असलेले तसेच उपचार घेऊन गेलेल्या रुग्णांसह खासगी रुग्णालयातून उपचार घेणाऱ्यांनाही साहाय्य केले जाणार आहे.
जिल्हा रुग्णालयातून नेमकी कोणती औषधे दिली जातील याबाबत अद्याप स्पष्टीकरण देण्यात आलेले नसले तरी या निर्णयाने दिलासा मिळाला आहे.
वडील कोरोेनामुक्त होऊन घरी परत आल्यानंतर त्यांना म्युकरमायकोसिसचा त्रास सुरू झाला. त्यांना रुग्णालयात दाखल करण्यात आले आहे. जिल्हा रुग्णालयात उपचार मिळत आहे. उपचार मोफत असले तरीही खर्च होणार आहे.
-रुग्णाचा मुलगा,
नंदुरबार,
सुरत येथील खासगी रुग्णालयात भावावर उपचार सुरू आहेत. डोळा निकामी झाला आहे. कोरोनावर उपचार सुरू असतानाच हा आजार समोर आला होता. प्रकृती बरी होत असली तरी इंजेक्शन खूप महागडे असल्याने चिंता आहे.
-रुग्णाचा भाऊ,
नंदुरबार.,
म्युकरमायकोसिस एक जीवघेणा आजार आहे. यातून रुग्णांचा बचाव करण्यासाठी जिल्हा रुग्णालयात उपचार व गरज पडल्यास शस्त्रक्रिया करण्याचे नियोजन आहे. यासाठी जिल्हा रुग्णालयातील दोन कान-नाक-घसा तज्ज्ञांसोबत चर्चा केली आहे. वेळ पडल्यास जिल्ह्यातील निष्णात अशा कान-नाक-घास तज्ज्ञांची मदत घेऊन रुग्णांना उपचार देण्याचा प्रयत्न राहणार आहे. रुग्णांचा आढावा घेतला जात आहे.
-डाॅ. आर. डी. भोये, जिल्हा शल्यचिकित्सक, नंदुरबार