कोरोना संसर्ग रोखण्यासाठी शहाद्यात उपाययोजना

प्रांताधिकारी डॉ. चेतन गिरासे यांनी नागरिकांना आवाहन केले आहे. शहादा तालुक्यात गेल्या वर्षी एप्रिलच्या मध्यात पहिला कोरोना रुग्ण आढळला. त्यानंतर काही महिने याचा प्रादुर्भाव मोठ्या प्रमाणात जाणवला होता. नागरिकांनी संयम आणि नियमांचे पालन केल्याने त्याला काही प्रमाणात अटकाव घालण्यात आपणास यश मिळाले; परंतु एक महिनापासून पुन्हा रुग्णसंख्या वाढत आहे. यासाठी जिल्हा प्रशासनाने रात्री संचारबंदी लागू केली व काही निर्बंधदेखील लागू केले आहेत. कोरोना रुग्णांची संख्या लक्षात घेता व्यापारी, त्यांच्याकडे काम करणारे कामगार, विक्रेते यांच्या रॅपिड अँटिजन टेस्टद्वारे मोठ्या प्रमाणावर चाचणी करणे नियोजित आहे. यासाठी शहरात शासकीय विश्रामगृह, सप्तशृंगी माता मंदिर, टॅक्सी स्टँड, काझी चौक, नगरपालिका, मिशन हायस्कूल या सहा ठिकाणी वैद्यकीय पथक टेस्ट करणार आहेत. सर्वांनी टेस्ट करून घ्यावी व कोरोना संसर्गास आळा घालावा. जे व्यापारी-विक्रेते टेस्ट करणार नाहीत त्यांची आस्थापना प्रशासनामार्फत सील करण्यात येईल व कारवाईही करण्यात येईल. मास्क व सॅनिटायझरचा वापर करावा, असे आवाहन प्रांताधिकारी डॉ. चेतन गिरासे यांनी केले आहे.