नंदुरबार : सर्वोच्च न्यायालयाने मराठा आरक्षण रद्द केले आहे. या निर्णयाच्या विरोधात नंदुरबार येथील क्षत्रिय मराठा युवा प्रतिष्ठानच्या वतीने शहरातील जुनी नगरपालिकेजवळ निषेध आंदोलन करण्यात आले. केंद्र व राज्य सरकारच्या दुर्लक्षामुळे मराठा समाजाच्या पदरी आरक्षण रद्दची निराशा पडली आहे. मराठा समाजाचे आरक्षण रद्द होण्यास केंद्र व राज्य सरकारच जबाबदार असल्याची प्रतिक्रिया क्षत्रिय मराठा युवा प्रतिष्ठानचे संस्थापक अध्यक्ष प्रवीण मराठे यांनी यावेळी व्यक्त केली.
मराठा समाजाला प्रगती व विकासाच्या दृष्टीने भारतीय संविधानानुसार आरक्षण देण्यात यावे, या मागणीसाठी समस्त मराठा समाजाने राज्यभर आंदोलने केली होती. या आंदोलनांवेळी काही मराठा समाजातील युवकांनी बलिदानही दिले आहे. मराठा समाजाने आरक्षणासाठी संयमाने न्यायालयीन लढाई दिली; परंतु केंद्र व राज्य सरकारच्या दुर्लक्षामुळे सर्वोच्च न्यायालयात पुरावे सादर न केल्याने मराठा आरक्षण न्यायालयात टिकू शकलेे नाही. यामुळे सर्वोेच्च न्यायालयाने मराठा आरक्षण रद्द करण्याचा निर्णय दिला. या निर्णयाने मराठा समाजाच्या पदरी संघर्षानंतर पुन्हा आरक्षणाच्या बाबतीत निराशाच आली आहे. मराठा आरक्षण रद्द झाल्याच्या निषेधार्थ नंदुरबार येथील जुनी नगरपालिका परिसरात क्षत्रिय मराठा युवा प्रतिष्ठानच्या वतीने निषेध आंदोलन करण्यात आले. यावेळी न्यायासाठी लढा देेऊच, समाजातील युवकांचे बलिदान वाया जाऊ देणार नाही, असे म्हणत एक मराठा लाख मराठा, जय शिवाजी, जय भवानी अशा घोषणा देण्यात आल्या. याप्रसंगी क्षत्रिय मराठा युवा प्रतिष्ठानचे संस्थापक अध्यक्ष प्रवीण महेश मराठे, पप्पू मराठे, निलेश जगताप, यशराज मराठे उपस्थित होते.