कोंढावळ : गेल्या आठ दिवसांपासून गावात मलेरिया, टायफाईडसह कोरोना रुग्णांच्या संख्येत वाढ होत असल्याचे आढळून येत असून, दोन जणांचा मृत्यू झाल्याची घटना घडली आहे. त्यामुळे गावात आरोग्य विभागातर्फे २७ मार्च रोजी ११४ जणांचे स्वॅब घेण्यात आले होते. त्यापैकी ४९ जणांचा अहवाल ३१ मार्च रोजी कोरोना पाॅझिटिव्ह आला आहे. त्यामुळे संपूर्ण गावात दहशतीचे वातावरण निर्माण झाले आहे.
गेल्या चार दिवसांत या ४९ लोकांचा किती जणांशी संपर्क आला हे शोधून काढणे जिकिरीचे झाले आहे. गुरुवारी दुपारी आरोग्य कर्मचाऱ्यांनी व आशा सेविकांनी गावातील कोरोना पाॅझिटिव्ह रुग्णांच्या घरी जाऊन गोळ्यांचे वाटप केले. यावेळी एकही वैद्यकीय अधिकारी उपस्थित नव्हता.
एकाच दिवशी ४९ जणांचा पाॅझिटिव्ह अहवाल आल्याने प्रशासनाने एकाही रुग्णाला रुग्णालयात नेले नसल्याने गावात भीतीचे वातावरण निर्माण झाले आहे. त्यामुळे आरोग्य विभागाने वेळीच याकडे लक्ष न दिल्यास मोठ्या प्रमाणावर रुग्णांना आपला जीव गमवावा लागणार असल्याचे बोलले जात आहे. तसेच गावातील प्रत्येक घरोघरी जाऊन कोरोना तपासणी करण्यात यावी, अशी मागणी करण्यात येत आहे.
यावेळी महसूल प्रशासनातर्फे गावाला नाेटीस देण्यात आली असून, १ एप्रिल ते १५ एप्रिलपर्यंत गावात लाॅकडाऊन घोषिक करण्यात आले असून, या बंद कालावधीत अत्यावश्यक सुविधेव्यतिरिक्त कोणतीही प्रतिष्ठाने सुरू राहणार नाही, असे आदेश देण्यात आले आहेत.
यावेळी लक्ष्मण भिल, डिगंबर माळी, पोलीस पाटील सुरेशगीर बावा, मंडळ अधिकारी विजय साळवे, एस. आर. सावळे, महेश ठाकरे, धनंजय वळवी, राकेश माळी, नवनीत माळी, आरोग्य कर्मचारी, आशा सेविका, आदींनी गावात पाहणी केली.
तीन वर्षांपासून बंद पडलेला फिल्टर प्लॅन सुरू करा
गावात शुद्ध पाणीपुरवठा करण्यासाठी उभारण्यात आलेला फिल्टर प्लॅन गेल्या तीन वर्षांपासून बंदावस्थेत पडून आहे. तो लवकरात लवकर दुरुस्त करून सुरू करण्यात यावा, अशी मागणी ग्रामस्थांकडून करण्यात येत आहे. या प्लॅनमुळे गावातील नागरिकांना शुद्ध पिण्याचे पाणी उपलब्ध होणार आहे.