नंदुरबार : जिल्ह्यातील कोरोनाबाधित रुग्णांची संख्या लवकरच २० हजाराचा टप्पा पूर्ण करणार आहे. दर दिवशी वाढत असलेल्या रुग्णांना बेड देणे मिळणे अशक्य होत असताना नवीन कोरोनाबाधितांना सेवा देताना आरोग्य सेवेवर ताण निर्माण झाल्याचे दिसून आले आहे. एकट्या जिल्हा रुग्णालयात सध्या केवळ १३२ वैद्यकीय अधिकारी व कर्मचारी कार्यरत आहेत. रुग्णांच्या संख्येनुसार ही संख्या २५० पेक्षा अधिक असायला हवी असे आरोग्य विभागातील वरिष्ठ अधिकाऱ्यांचे म्हणणे आहे.
जिल्ह्यात आजअखेरीस १८ हजार रूग्ण समोर आले आहेत. यातील १२ हजार कोरोनामुक्त आहेत. सध्या जिल्ह्यात ५ हजार ६५५ कोरोना रुग्ण आहेत. आजवरचा हा सर्वोच्च आकडा आहे. यातील मुक्त झालेल्यांना सातत्याने घरी सोडले जात असले तरी जिल्हा रुग्णालयातील १४० रूग्णांची क्षमता असतानाही याठिकाणी २०५ रुग्ण दाखल आहेत. आरोग्य विभाग बेड मॅनेजमेंटसाठी लक्षणे नसलेल्या रुग्णांना घरीच क्वारंटाईन करुन गोळ्या औषधी देत त्यांना बरे करत असल्याची माहिती आहे. सध्या होम आयासोलेशमध्ये असलेल्यांची संख्या ही केवळ ११८ एवढीच आहे. यात नंदुरबार ५२, शहादा ३८, तळोदा १५, तर नवापूर तालुक्यात १३ जण होमक्वारंटाईन आहेत. आरोग्य विभागाच्या माहितीनुसार जिल्ह्यात शासकीय व खाजगी रुग्णाालये मिळून ८०४ बेड आहेत. यातील १०३ ह्या रिकाम्या असल्याचे आकडेवारीतून स्पष्ट होत आहे. तर तीन सीसीसी सेंटरमध्ये ४५० बेड तयार करण्यात आले असून २६१ रुग्ण त्याठिकाणी दाखल असून १८९ बेड हे रिक्त आहेत. रुग्णालये आणि सीसीसी सेंटर यांच्या एकत्रित ९६२ खाटांपैकी ७०१ बेडवर रुग्ण आहेत. यात होमक्वारंटाईन ११८ असले तरीही उर्वरित साडेचार हजार ॲक्टीव्ह रुग्णांचे काय, असा प्रश्न उपस्थित होते. एकीकडे ही स्थिती असतानाही गंभीर रुग्णांचा आकडा हा दिवसेंदिवस वाढत असून या रुग्णांना सेवा देण्यासाठी बोटावर मोजण्याएवढेच वैद्यकीय अधिकारी मात्र जिल्हा रुग्णालयात उपलब्ध आहेत. सध्या जिल्हा रुग्णालयात एमबीबीएस चार तर बीएचएमएस झालेले चार वैद्यकीय अधिकारीच कार्यरत आहेत. जिल्हा रुग्णालयात २०० रुग्णांची देखभाल करण्यासाठी १३२ कर्मचारी सध्या कार्यरत असले तरी यात केवळ आठच डाॅक्टर आहेत. नगण्य असलेल्या प्रशिक्षित वैद्यकीय अधिका-यांच्या संख्येमुळे रुग्णसेवेचा ताण दिवसेंदिवस वाढत आहे.
यात कोरोना रुग्णालयात ड्यूटी करण्यासाठी ऑर्डर काढूनही अनेकजण येत नसल्याची धक्कादायक माहिती देण्यात आली आहे. यामुळे जिल्हाधिकारी यांनीच या प्रकाराकडे गांभिर्याने लक्ष देत कार्यवाही करण्याची अपेक्षा व्यक्त करण्यात येत आहे.