नंदुरबार : दुचाकी व चारचाकीसह जड वाहनांनाही लावण्यात आलेले कर्णकर्कश हॅार्न ध्वनिप्रदूषण तर करीत आहेतच शिवाय अनेकांच्या आरोग्यालाही धोका पोहचवत आहेत. याबाबतचा कायदा संबंधितांकडून धाब्यावर बसविला जात आहे. वाहतूक विभागातर्फे कारवाई केली जात असली तरी ती मर्यादित स्वरूपाची राहत असल्यामुळे अशा वाहनचालकांचे फावत असल्याचे चित्र आहे.
कर्णकर्कश हॅार्न आणि आवाज करणारे सायलेन्सरचे फॅड तरुणाईत मोठ्या प्रमाणावर आहे. अनेक युवक आपल्या दुचाकीला रुग्णवाहिकेसारखे हॅार्न बसवित असतात. शिवाय काहीजण चित्रविचित्र आवाजाचे हॅार्नदेखील बसवितात. काहीजण तर कानठळ्या बसविणारे हॅार्न बसवून आपली मर्दुमकी गाजवत असतात. यामुळे मात्र अनेकांना आरोग्याच्या समस्येला सामोरे जावे लागते. शिवाय ध्वनिप्रदूषणाचेदेखील उल्लंघन केले जात असल्याचे चित्र आहे. वाहतूक शाखा वेळोवेळी यासंदर्भात कारवाई करीत असली तरी ती मर्यादित स्वरूपाची राहत असल्याचेही चित्र आहे.
बुलेट केल्या होत्या जप्त
n वाहतूक शाखेतर्फे तीन महिन्यांपासून आवाज करणारे सायलेन्सर बसविणाऱ्यांवर कारवाई करण्यात आली होती. दहा वाहने जप्त करून ३० पेक्षा अधिक वाहनधारकांवर कारवाई करण्यात आल्याने हा प्रकार आता कमी झाला.
कर्णकर्कश हॅार्न लावलेले वाहनधारक मोकाटच...
n नंदुरबारसह शहादा शहरात कर्णकर्कश आवाज असलेल्या हॅार्न लावण्याचे फॅड आहे. त्यामुळे असे वाहनधारक मोकाटच आहेत. वास्तविक नंदुरबार शहरात औद्योगिक क्षेत्र नसल्यामुळे सर्वच क्षेत्र हे शांतता झोन म्हणून आहे. त्यामुळे विशिष्ट डेसिबलपेक्षा अधिक आवाजाचे हॅार्न वाजविण्याचे प्रकार सर्रास आहे. त्यामुळे अशा वाहनधारकांवर सरसकट कारवाई करणे अपेक्षित आहे.
पाच वर्ष कैद किंवा एक लाख रुपये दंड
n पर्यावरण संरक्षण कायदा १९८६ नुसार शांतता झोन असलेल्या परिसरात विशिष्ट डेसिबलपेक्षा अधिक आवाजाचे हॅार्न वाजविण्यास मनाई आहे. त्याचे उल्लंघन झाल्यास पोलीस कारवाई होऊन पाच वर्ष कैद व एक लाख रुपये दंडाची शिक्षा करण्याचे प्राविधान या कायद्यात आहे.
कर्णकर्कश हॅार्न आणि आवाज करणारे सायलेन्सर या विरोधात वाहतूक शाखेतर्फे लवकरच कारवाई सुरू होणार आहे. पोलीस अधीक्षकांनी सूचना केलेल्या आहेत. लवकरच याबाबत नियोजन करून मोहीम राबविण्यात येईल. दररोज याबाबत कारवाई होतेच. -रवींद्र कळमकर,
प्रभारी निरीक्षक, वाहतूक शाखा.