लोकमत न्यूज नेटवर्कब्राह्मणपुरी : राज्य शासनाकडून ग्रामीण भागात राबविण्यात येत असलेल्या ग्रामस्वच्छता अभियानाकडे तालुका प्रशासनाचे दुर्लक्ष होत असल्याने तालुक्यात स्वच्छता अभियानाचा फज्जा उडाल्याचे चित्र आहे. गेल्या दोन वर्षांपासून पंचायत समितीच्या वतीने तालुक्यात १०० टक्के शौचालय बांधकाम करून तालुका हगणदारीमुक्त करण्याचा संकल्प करण्यात आला आहे. त्यासाठी गावागावांत जनजागृती करून जनतेला स्वच्छतेचे महत्त्व पटवून देण्यात आले. यामुळे बऱ्याच प्रमाणात हगणदारीमुक्त अभियानाला यश मिळाल्याचे दिसत होते; परंतु गेल्या सहा महिन्यांपासून कोरोनामुळे या अभियानाकडे प्रशासनाने पाठ फिरविल्याने तालुक्यात हगणदारीमुक्तीसह स्वच्छतेचा फज्जा उडाल्याचे चित्र सर्वत्र पहायला मिळत आहे. शासनाने अनेकवेळा ‘स्वच्छतेकडून सुरक्षितते’कडे असे घोषवाक्य देऊन गावे किती स्वच्छ केली. परंतु जी गावे स्वच्छ व हगणदारीमुक्त झालेली आहेत त्या गावांतील परिस्थिती सध्या विदारक असून, हीच का ती स्वच्छ व हगणदारीमुक्त गावे, असाही प्रश्न निर्माण झाल्याशिवाय राहत नाही. अनेक गावांत शौचालय निर्माण झाले खरे, परंतु त्याचा वापरही योग्य पद्धतीने होत नसून, नागरिक उघड्यावर शौचास जाण्यास प्राधान्य देत असल्याचे चित्र आहे.
अनेक गावांत अभियान नावापुरतेचअनेक गावांमध्ये हे अभियान केवळ नावापुरतेच राबविले जात असल्याची चर्चा आहे. ग्रामीण भागात गावामध्ये प्रवेश करताक्षणीच अस्वच्छतेचे दर्शन होते. ही बाब प्रशासकीय अधिकाऱ्यांनाही माहिती आहे, असे असताना तेसुद्धा याकडे डोळेझाक करीत असल्याचे चित्र आहे. स्वच्छता अभियानात प्रशासनासह नागरिकांचाही सहभाग महत्त्वाचा आहे. यासाठी प्रशासनाकडून ग्रामस्थांमध्ये जनजागृती करण्याची गरज आहे. यावेळी ग्रामपंचायत प्रशासन, पदाधिकारी यांची भूमिका महत्त्वाची आहे. ग्रामस्थांनीही आपल्या जबाबदारीचे भान ठेवून वागल्यास गावात स्वच्छता राहून विविध आजारांना दूर ठेवता येऊ शकते.