नीलेश रमेश गावीत व लाजरस गावीत, रा.रायपूर, ता.नवापूर असे मयत युवकांची नावे आहेत. नवापूर तालुक्यातील घोडजामणे गावानजीक याकुब गावीत यांचा शनिवारी अपघात झाला. त्याला नवापूर उपजिल्हा रुग्णालयात दाखल करण्यात आले होते. त्याला पाहण्यासाठी त्याचा भाऊ नीलेश गावीत व मित्र लाजरस गावीत हे नवापूर रुग्णालयात आले होते. त्यानंतर रुग्णालयातून घरी परत जात असताना सुरतकडून येणाऱ्या ट्रकने (क्रमांक एनएल ०१-एई ३३१८) वीज वितरण कंपनी समोर युवकांच्या मोटारसायकलीला (क्रमांक एमएच ३९ एई ४६७३) जोरदार धडक दिल्याने या अपघातात दोघे जण गंभीर जखमी झाले. नवापूर शहरातील महामार्गनजीक असलेले दुकानदार व नागरिक व युवकांनी घटनास्थळी धाव घेऊन दोघा अपघातग्रस्तांना नवापूर उपजिल्हा रुग्णालयात दाखल केले. तेथे उपचार केल्यानंतर दोघांना व्यारा येथील खासगी दवाखान्यात दाखल करण्यात आले. नीलेश गावीत याचा रस्त्यातच तर लाजरस गावीत याचा उपचार घेतांना मृत्यू झाला. दुपारी नीलेश गावीत यांच्यावर अंतिम संस्कार करण्यात आले. एकाच गावातील दोन युवकाचा मृत्यू झाल्याने हळहळ व्यक्त केली जात आहे. रायपूर गावात शोकाकुल वातावरण निर्माण झाले आहे. नवापूर पोलिसांनी ट्रक चालकांवर गुन्हा दाखल केला आहे. सहचालकाला ताब्यात घेण्यात आले आहे.
महामार्गावर गतिरोधकाची मागणी
नवापूर शहरातील महामार्ग चौपदरीकरणाचे काम सुरू आहे. दोन्ही बाजूस ६-७ फूट खड्डे करून ठेवले आहे. अरुंद महामार्ग झाल्याने भरधाव वेगात येणाऱ्या वाहनांमुळे अपघाताचे प्रमाण वाढेल आहे. पूर्वीप्रमाणे नवापूर उपजिल्हा रुग्णालय जवळ व प्रवेशद्वारानजीक गतिरोधक बसण्याची मागणी नागरिकांनी केली आहे.
आपल्याच कार्यालयासमोर मृत्यू
रायपूर येथील नीलेश रमेश गावीत गेल्या काही वर्षांपासून वीज वितरण कंपनीत कंत्राटी कर्मचारी म्हणून काम करीत होता. त्याच कार्यालयासमोर त्याचा दुर्दैवी मृत्यू झाल्याने हळहळ व्यक्त होत आहे.
घटनेचे माहिती मिळताच पोलीस निरीक्षक बाळासाहेब भापकर यांनी तत्काळ घटनास्थळी पोलीस रवाना केले. अपघातग्रस्त ट्रक व सहचालकाला अटक करण्यात आली. या दरम्यान सहचालकाला जमावाने बेदम मारहाण केल्याने त्यालादेखील उपजिल्हा रुग्णालयात आणण्यात आले होते.