याबाबत सविस्तर माहिती अशी की, शहादा तालुक्यातील मंदाणे येथील युवक भूषण संतोष सैंदाणे यांच्याशी बाबाराव देवराम आमले (रा. औरंगाबाद) यांनी सोनू राजू शिंदे (रा.हिंगोली) या युवतीशी एक लाख ३० हजार रुपये व वधूला काही दागिने देण्याच्या बोलीवर लग्न निश्चित करण्यात आले होते. ६ मे रोजी मंदाणे येथे भूषण संतोष सैंदाणे यांच्याशी लग्न समारंभ पार पडला होता. मात्र अवघ्या दहा दिवसातच मुलीने पोबारा करून दुसऱ्याच तरुणाशी लग्न करण्याचा प्रकार उघडकीस आल्याने मंदाणे परिसरात एकच खळबळ उडाली आहे.
याप्रकरणी भूषण सैंदाणे यांनी फसवणूक झाल्याची फिर्याद दिल्याने आठ जणांविरुद्ध शहादा पोलीस स्टेशनला गुन्हा दाखल करण्यात आला. अटकेत असलेल्या सोनू शिंदे, पूजा साळवे, योगेश साठे, मुलीची आई वंदना शिंदे, रवींद्र गोपाळ यांना तीन दिवस पोलीस कस्टडी मिळाली असून मुख्य सूत्रधार बाबाराव आमले (रा. औरंगाबाद), मुलीचा भाऊ भैरव शिंदे, प्रीती कांबळे (रा. हिंगोली) हे फरार होण्यात यशस्वी झाले.
राज्यभरात पाळेमुळे
एखाद्या सामान्य कुटुंबाला हाताशी धरून मुलीच्या आई-वडिलांना पैशांचे आमिष दाखवून तरुणांना लग्नाच्या जाळ्यात अडकवून व बनावट लग्न उरकून लाखो रुपये लुटणाऱ्या या टोळीचा पोलिसांनी वेळीच गांभीर्य घेतल्याने पर्दाफाश झाला असलातरी अशा अनेक टोळ्या असण्याची शक्यता वर्तवण्यात येत आहे. राज्यभरात या टोळ्यांची पाळेमुळे खोदून काढल्यास अनेकांची फसवणूक झाल्याचे उघड झाल्याशिवाय राहणार नाही, अशी प्रतिक्रिया जाणकार व्यक्तींनी व्यक्त केली आहे. संबंधित तरुणीचे आतापर्यंत किती जणांशी लग्न लावण्यात आले आहे, याचीही चौकशी झाल्यास बऱ्याच गोष्टी उघड होतील. सूत्रधारास पकडल्यास अनेक गुन्हे उघडकीस येणार आहेत. या टोळीतील मुख्य सूत्रधार बाबाराव आमले याच्यासह दोन्ही फरार आरोपी पकडले गेल्यास त्यांनी सोनू शिंदेसारख्या अशा किती मुलींना पुढे करत किती तरुणांना बनावट लग्न लावून लाखो रुपयात फसवले या सर्व बाबी निश्चितपणे उघड होणार असल्याची शक्यता वर्तवण्यात येत आहे. या संपूर्ण गुन्ह्याचा तपास पोलीस निरीक्षक दीपक बुधवंत यांच्या मार्गदर्शनाखाली सहायक पोलीस निरीक्षक सुरेश सोनवणे, असलोद दूरक्षेत्राचे हवालदार दीपक परदेशी, हवालदार चौरे, अमृत पाटील, विश्वास साळुंके हे करीत आहेत.
तरुणांची लग्न करून फसवणूक करीत लाखो रुपये लुटणाऱ्या टोळीने संपूर्ण खान्देशात अशा अनेक घटना केल्या आहेत. अशा पद्धतीने ज्या कोणाची फसवणूक झाली असल्यास त्यांनी तत्काळ शहादा पोलिसांशी संपर्क करावा.
-दीपक बुधवंत, पोलीस निरीक्षक, शहादा पोलीस स्टेशन