नंदुरबार : कोरोनासोबत लढा देताना शारीरिक आरोग्य अबाधित रहावे, यासाठी नागरिक इम्युनिटी वाढवणारे अन्नपदार्थ घेण्यावर भर देत आहेत. यातून भाजीपाल्याला सर्वाधिक पसंती असून शेतकरीही विविध भाज्यांची लागवड वाढवत आहेत.
नंदुरबार तालुक्याच्या विविध भागात ही लागवड करण्यावर शेतकरी भर देत आहेत. जिल्ह्यात लिंबू, अद्रक, पुदीना, हळद या अपारंपरिक पिकांसह पारंपरिक भाजीपाला पिकांना पसंती दिली जात आहे. ९० दिवसात येणारा हा भाजीपाला शेतकऱ्यांना आर्थिकदृष्ट्या तर नागरिकांना शारीरिकदृष्ट्या सक्षम करणार आहे.
कोरोनामुळे भाजीपाला लागवड करून तो सेंद्रिय पद्धतीने पिकवण्यावर शेतकरी भर देत आहेत. शारीरिक क्षमता वाढवणाऱ्या भाजीपाल्याच्या लागवडीवर शेतकरी भर देत आहेत. यातून रोप व बियाणे विक्री वाढली आहे.
-दीपक मराठे,
नर्सरीचालक, रांझणी ता. तळोदा.
पुदिना : जिल्ह्यातील विविध नर्सरी तसेच शेतकरी पुदिनाचे उत्पादन घेतात. त्यांच्याकडून रोपांना ठोक बाजारपेठेत विक्री करण्यात येते. शारीरिक क्षमता वाढीत पुदिनाला महत्त्व असल्याने शेतकरी वाढीव लागवड करत असल्याचे नर्सरी चालकांकडून सांगण्यात आले. उत्पादन अधिक आल्याने गेल्या काही दिवसात त्याचे दरही पडले.
शेवगा : बहुगुणकारी शेवगा जिल्ह्यात लागवड केला जात होता. परंतु त्याचे क्षेत्र कमी होते. परंतु गेल्या सहा महिन्यात शेवगा लागवडीचे क्षेत्र वाढले आहे. दीर्घ काळाचे पीक असलेल्या शेवग्याला मोठी मागणी आहे. यातून त्यांची झाडे लावली जात आहेत. अनेकांनी गुजरात राज्याच्या विविध भागातून रोपांची आवक केली होती.
मेथी : नंदुरबार तालुक्याच्या विविध भागात पारंपरिक पद्धतीने मेथी लागवड होते. बाजारात बाराही महिने मेथीची आवक होते. पाण्याच्या भरवशावर शेतकरी मेथीची लागवड करतात. मेथीला नागरिकांकडून सर्वाधिक पसंती देण्यात येत असून स्वस्त असल्याने खरेदी वाढली आहे.
हळद : कोरोना काळात हळदीचा वापर वाढला आहे. पश्चिम महाराष्ट्रात लागवड होणारे हळदीचे पीक आता नंदुरबार जिल्ह्यात आले आहे. जिल्ह्यात हळदीचे खडे धुण्याची सोय झाल्याने लागवड वाढली आहे. ओली हळद आणि त्याचा पाला यालाही औषधी गुणधर्म आहेत.
गवती चहा : अद्रकसोबतच गवती चहाला मोठी मागणी आहे. तालुक्यातील काही भागात गवती चहाची लागवड केली जाते. भाजीपाला उत्पादक शेतकरी त्याचे उत्पादन घेतात. बाजारात नगण्य दरात मिळणारी गवती चहा सर्वाधिक गुणकारी मानली जाते.