शहादा : हिंगोली येथील युवतीने शहादा तालुक्यातील मंदाणे येथील युवकाशी पैसे घेऊन लग्न करून बेपत्ता झाल्यानंतर संबधीत युवतीने पुन्हा दुसरे लग्न केल्याची बाब समोर आल्यानंतर फसवणूक झाल्याचे स्पष्ट झाल्यावर मंदाणे येथील युवकाने शहादा पोलिसात फिर्याद दिली. याप्रकरणी आठ जणांवर गुन्हा दाखल करण्यात आला असून पाच संशयितांना अटक केली आहे तर उर्वरित तीन जण फरार झाले आहेत.
भूषण सैंदाणे, रा.मंदाणे असे फसवणूक झालेल्या युवकाचे नाव आहे. पोलिसांनी युवती पूजा तिची आई वंदना राजू शिंदे राहणार हिंगोली, रवींद्र गैभू गोपाळ रा.कुंभारी तालुका जामनेर, योगेश संजय साठे रा. अकोला प्रीती राजेश कांबळे रा. हिंगोली अशा पाच जणांना अटक केली आहे. तर या टोळीतील बाबाराव देवराव आंबले युवती पूजा चा भाऊ भैरव राजू शिंदे व पूजा प्रकाश साळवे सर्व राहणार हिंगोली हे तिघे जण फरार झाले आहे.
पोलीस सूत्रांनुसार,मंदाणे येथील भूषण संतोष सैदाने या युवकास बाबाराव देवराव आंंबले राहणार औरंगाबाद याने पाच मे रोजी लग्नासाठी एक मुलगी दाखवली. भूषण ला मुलगी पसंत पडल्यानंतर ६ मे रोजी मंदाने येथे त्याचा पूजा राजू शिंदे या मुलीशी विवाह पार पडला. लग्नकार्यासाठी भूषण च्या परिवाराने आंबले व मुलीच्या नातेवाईकांना एक लाख तीस हजार रुपये रोख रक्कम दिली होती. विवाह झाल्यानंतर पत्नी पूजा ही १४ मे पर्यंत मंदाने येथे राहिली मात्र १५ मेच्या पहाटे ती घरातून कोणालाही न सांगता अज्ञातस्थळी निघून गेली. सर्वत्र शोधाशोध घेतल्यानंतर भूषण याने शहादा पोलीस ठाण्यात पत्नी पूजा हरवल्या बाबत तक्रार दिल्यानंतर मिसिंग ची नोंद करण्यात आली.
२१ मे रोजी बेटावद येथे त्याच युवतीने दुसरा विवाह केल्याची बाब समोर आल्यानंतर फसवणूक झाल्याचे लक्षात आल्यावर भूषण सैंदाणे याने फिर्याद दाखल केली. त्यावरून गुन्हा दाखल करण्यात आला आहे. शहादा पोलिसांनी पाच जणांना अटक केली आहे. तपास पोलीस निरिक्षक दीपक बुधवंत करीत आहे.