तळोदा येथील तापी माँ परिसरात तळोदा नगरपालिकेच्या क्रीडा विभागाच्या माध्यमातून सन २०१९-२०२० मध्ये ओपन जिम मंजूर झाली होती. ही जिम काटेरी झाडाझुडपांमध्ये व जमीन ओबडधोबड असणाऱ्या ठिकाणी बसविण्यात आली होती. त्यामुळे स्थानिक नागरिकांकडून नाराजी व्यक्त करण्यात आली होती. ‘लोकमत’ने याबाबत सचित्र वृत्त प्रसिध्द केले होते. शिवसेनेने यावर आक्रमक भूमिका घेत जिल्हा क्रीडा अधिकाऱ्यांकडे तक्रार केली होती.
या पार्श्वभूमीवर जिल्हा क्रीडा अधिकारी सुनंदा पाटील यांनी शनिवारी तळोदा येथे भेट देत शहरातील बसविलेल्या ओपन जिमची पाहणी केली. या वेळी त्यांच्यासोबत नगराध्यक्ष अजय परदेशी, शिवसेना शहर प्रमुख जितेंद्र दुबे, जिल्हा क्रीडा कार्यालयाचे मुकेश बारी, महेंद्र काटे, पालिकेचे राजेंद्र माळी आदींसह स्थानिक नागरिक उपस्थित होते.
जिल्हा क्रीडा अधिकारी सुनंदा पाटील यांनी तापी माँ नगरमध्ये बसविण्यात आलेल्या ओपन जिमची पाहणी केली. त्यावेळी तेथे जेसीबीच्या सहायाने सपाटीकरण व स्वच्छतेचे काम चालू होते. याठिकाणी पाहणी करून स्थानिक रहिवाशांच्या मागणीनुसार व गरजेनुसार साहित्य बसवून देण्याच्या सूचना संबंधित ठेकेदाराला दिल्या. नगरसेवकांनी दाखविलेल्या जागेनुसार याठिकाणी साहित्य बसविण्यात आल्याचे त्यांनी सांगितले. परंतु नगराध्यक्ष अजय परदेशी यांनी पालिकेला विश्वासात न घेता ठेकेदाराने ओपन जिमचे साहित्य बसविण्यासाठी घाई केली, त्यामुळे हा प्रकार घडल्याचे सांगितले. तर शिवसेनेचे शहराध्यक्ष जितेंद्र दुबे यांनी ठेकेदाराला साहित्य बसविताना त्याठिकाणी काटेरी झाडे दिसली नाही का? असा सवाल केला.
जिल्हा क्रीडा अधिकारी यांनी स्थानिक नागरिकांचे म्हणणे ऐकून घेतले. पाहणीदरम्यान स्थानिक नागरिकांनी जिल्हा क्रीडा अधिकाऱ्यांना निवेदन देत काटेरी झाडे काढून तापी माँ नगरमधील जिम इतरत्र न हलविता याचठिकाणी असू द्यावी, अशी मागणी केली. सिताई नगरमधील ओपन जिमचीही पाहणी केली. त्याठिकाणी असलेले काटेरी झाडेही काढण्याची आवश्यकता असल्याचे दिसून आले. नगराध्यक्ष परदेशी यांनी तत्काळ ते काढण्याच्या सूचना दिल्या. त्यानंतर जिल्हा क्रीडा अधिकाऱ्यांनी शहरात बसविलेल्या सर्व ओपन जिमची पाहणी केली व ठेकेदाराला स्थानिक रहिवाशांची मते जाणून घेत त्यानुसार कामात दुरुस्ती करण्याच्या सूचना दिल्या.
तळोदा शहरात बसविण्यात आलेल्या सर्व ओपन जीमची शनिवारी पाहणी केली. या भेटीत लोकप्रतिनिधींसह स्थानिक रहिवाशांशी चर्चा करून त्यांच्या सूचनेनुसार ओपन जीममध्ये बदल करण्याच्या सूचना दिल्या आहे.
-सुनंदा पाटील, जिल्हा क्रीडा अधिकारी, नंदुरबार