नंदुरबार : जिल्ह्यात एकूण ५६६ कोरोनाबाधितांचा मृत्यू झाला आहे. कोरोनाचे संक्रमण शरीरात अधिक तीव्रतेने होऊन व्याधी बळावल्याने हे मृत्यू झाले असले तरी याला रक्तदाब व मधुमेहासारखे आजार सहाय्यकारी ठरल्याची माहिती देण्यात आली आहे. यामुळे दुर्धर आजार असलेल्यांनी अधिक काळजी घेण्याचे वैद्यकीय तज्ज्ञांचे म्हणणे आहे.
मार्च आणि एप्रिल या दोन महिन्यांत जिल्ह्यात कोरोनाबाधितांच्या मृत्यूंची संख्या दुपटीने वाढली आहे. फेब्रुवारी महिन्यात नियंत्रणात असलेला कोरोना अचानक वाढीस लागल्याने पाच मार्चनंतर मृत्यूंची संख्या वाढीस लागली होती. यातून दर दिवशी पाचपेक्षा अधिक मृत्यू होत असल्याचे दिसून येत होते. यात वृद्धांचे मृत्यू होण्याचे प्रमाण हे अधिक असल्याचे सांगण्यात आले आहे. दरम्यान, या मृत्यूत मधुमेह, रक्तदाब, हायपर टेन्शन यासह दुर्धर व दीर्घ आजार असलेल्यांचे प्रमाण अधिक असल्याचे सांगण्यात येत होते. आधीच व्याधी असताना काळजी न घेतल्याने कोरोनाचा विषाणू फुफ्फुसामध्ये वाढीस लागल्याने मृत्यू ओढावल्याचे जिल्हा रुग्णालयाकडून करण्यात आलेल्या डेथ ऑडिटमध्ये समोर आले आहे. वेळाेवेळी रुग्णांच्या प्रकृतीचा आढावा घेत मृत्यूची कारणे समोर आणण्याचा प्रयत्न जिल्हा आरोग्य विभागाकडून करण्यात येत असल्याची माहिती देण्यात आली आहे. यातून दुर्धर आजार असलेल्यांना बाधा झाल्यानंतर सातत्याने मार्गदर्शन करण्यात येत असल्याचेही सांगण्यात आले आहे.
अतिजाेखमीच्या व्यक्तींनी काळजी घेण्याची गरज
दरम्यान, कोरोनाचा संसर्ग होऊ शकणाऱ्या मधुमेह, रक्तदाब, हायपर टेन्शन, हृरदयरोगी, दुर्धर आजारी, कॅन्सरग्रस्त, एचआयव्ही बाधित, टीबीग्रस्त रुग्णांसाठी आरोग्य प्रशासनाने काळजी कशी घ्यावी याबाबत सूचना केल्या आहेत. या रुग्णांनी बाधा होण्याची शक्यता असल्याने कोविड नियमांचे काटेकोरपणे पालन करून दैनंदिन कामकाज करावे, असे सांगण्यात आले आहे. विविध आजारांवर उपचार घेत असतानाही काळजी घेत, सातत्याने वैद्यकीय तज्ज्ञांचा सल्ला घेत औषधी घ्याव्यात, अशाही सूचना करण्यात आल्या आहेत.
जिल्हा रुग्णालयात दाखल होणाऱ्या रुग्णांची मेडिकल हिस्ट्री माहिती करून घेत उपचार केले जात आहेत. रुग्णाला योग्य ते मार्गदर्शन करून समुपदेशनही करण्यात येत आहे. आजार बळावू नये यासाठी प्रयत्न आहे.
-डाॅ. के. डी. सातपुते, अतिरिक्त जिल्हा शल्यचिकित्सक, नंदुरबार.