लोकमत न्यूज नेटवर्कधडगाव : धडगाव तालुका अतिदुर्गम व आदिवासी तालुका म्हणून ओळखला जातो. १६२ गावे व ५४० पेक्षा जास्त पाडे असलेल्या तालुक्यातील धडगाव ही एकमेव बाजारपेठ असल्यामुळे याठिकाणी होणारी गर्दी रोखण्यासाठी तारेवरची कसरत करावी लागत आहे. नर्मदा काठावर तालुकाला वसला असून, या तालुक्याला लागूनच मध्य प्रदेशची सिमा आहे. नर्मदेतून बोटीद्वारे धडगावात येणाऱ्या प्रत्येक नागरिकांकडे पोलीस व प्रशासनासह आरोग्य विभाग लक्ष ठेवून आहे.तालुक्यात इतर राज्य व जिल्ह्यातून आलेल्या नऊ हजार ४८५ लोकांची वैद्यकीय तपासणी करून त्यांना होमक्वॉरंटाईन करण्यात आले. तालुक्यातील १३ प्राथमिक आरोग्य केंद्रात होमक्वॉरंटाईन पथक तयार करून या सर्वांची सलग १४ दिवस तपासणी करून आशा वर्कर व आरोग्य कर्मचाऱ्यांतर्फे पाठपुरावा करण्यात येतो. अद्यापपर्यंत तालुक्यातील सात संशयित रूग्णांचे स्वॅब तपासणीसाठी पाठविले असता सर्वांचे रिपोर्ट निगेटीव्ह आले आहेत.तालुक्यांतर्गत एकूण सहा ठिकाणी चेकपोस्ट तैनात करण्यात आले आहेत. याकडे वैद्यकीय अधिकारी, आरोग्य कर्मचारी, पोलीस व स्थानिक पातळीवरील ग्रामसुरक्षा दलाचे कर्मचारी लक्ष देवून आहेत.शासकीय आश्रमशाळा मांडवी येथे कोविड केंद्र स्थापन करण्यात आले आहे. तेथील रूग्णाना दोन वेळेचे जेवण देण्यात येते. तसेच ग्रामीण रूग्णालय धडगाव येथे समर्पित कोवीड आरोग्य केंद्र तयार करण्यात आले आहे. दोन्ही ठिकाणी २४ तास वैद्यकीय अधिकारी व आरोग्य कर्मचारी हजर आहे. इथे दाखल असलेल्या सर्व लोकांची दररोज काळजीपूर्वक आरोग्य तपासणी करण्यात येते. याठिकाणी २४ तास १०८ रूग्णवाहिका व त्यावरील डॉक्टर उपस्थित आहेत. याठिकाणी तपासणी केंद्र सुरू आहे.यासाठी तालुका आरोग्य अधिकारी डॉ.दिनेश बडे यांना स्थानिक प्रशासन, गटविकास अधिकारी चंद्रकांत बोडरे, तहसीलदार ज्ञानेश्वर सपकाळे, पोलीस निरीक्षक डी.एस. गवळी, जिल्हा परिषद सदस्य विजयसिंग पराडके, माजी जिल्हा परिषद सदस्य हारसिंग पावरा, धनसिंग पावरा यांच्यासह प्रत्येक गावाचा पोलीस पाटील, ग्रामसेवक, तलाठी, कोतवाल, पत्रकार, सामाजिक कार्यकर्ते काकडदा व बिजरी येथील ग्रामरक्षक दलाचे मोलाचे सहकार्य लाभले. या सर्वाच्या सहकार्यामुळे तालुक्यात मोठ्या प्रमाणात जागृती निर्माण झाल्याने हे शक्य झाले.
धडगाव तालुक्यात कोरोनाचा शिरकाव होऊ शकला नसल्याने ही बाब नक्कीच आनंदाची आहे. परंतु कोरोना विरूद्धची लढाई अजून संपलेली नाही. अजूनही बाहेरून बरेचसे मजूर, विद्यार्थी परत येत आहेत. या सर्वांवर आपल्याला काळजीपूर्वक लक्ष ठेवायचे आहे. आतापर्यंत आरोग्य विभागामार्फत बाहेरील राज्यातून व इतर जिल्ह्यातून आलेल्या नागरिकांची तपासणी करून त्यांचावर १४ दिवस लक्ष ठेवले आहे. तालुक्यातील नागरिकांना स्वत:ची, परिवाराची व गावाची काळजी घेऊन आरोग्य विभागास सहकार्य करावे. तसेच सर्दी, ताप, खोकला, श्वास घेण्यास त्रास होणे यापैकी कोणतेही लक्षण आढळल्यास त्वरित नजीकच्या आरोग्य केंद्राशी संपर्क साधावा. धडगाव तालुका यापुढेही कोरोना मुक्त राहील यासाठी सर्वांनी प्रयत्न करणे गरजेचे आहे.-डॉ.दिनेश बडे, तालुका वैद्यकीय अधिकारी, धडगावशासनाने वेळोवेळी दिलेल्या सूचनांचे काटेकोरपणे पालन केल्यामुळे व पोलीस प्रशासन, आरोग्य विभाग यांच्या कामगिरीमुळे हे शक्य झाले.- ज्ञानेश्वर सपकाळे, तहसीलदार, धडगाव