नवापूर तालुक्यात कोरोना लसीकरण सुरू

नंदुरबार जिल्ह्यातील रुग्णालयात लसीकरण सुरू झाले. त्यापैकी प्रमुख असलेले नवापूर उपजिल्हा रुग्णालयातील कोविड लसीकरण केंद्रावर ज्येष्ठांनी गर्दी करत मोठ्या उत्साहात लस घेतल्याचे दृष्य दिसून आले. मागील दोन दिवसांपासून कोविन ॲप बंद होते. त्यामुळे ज्येष्ठांची ऑनलाइन नोंदणी कशी करावी यासह अनेक बाबतीत संभ्रमाची स्थिती होती. नुकताच कोविन ॲप सुरू झाल्याने काही ज्येष्ठ नागरिकांनी ऑनलाइन नोंदणी केली तर काहींनी थेट नवापूर उपजिल्हा रुग्णालयात रुग्णालयातील कोविड लसीकरण केंद्र गाठले. त्यामुळे बहुतांश ज्येष्ठ नागरिकांनी लसीकरण केंद्रावरच नोंदणी करून लसीचा पहिला डोस घेतला. तांत्रिक अडचण सोडविण्यात आल्याने ज्येष्ठांना सहज लस उपलब्ध झाल्याने अनेकांनी समाधान व्यक्त केले. याठिकाणी ज्येष्ठांमध्ये उत्साह दिसून आला. नवापूर उपजिल्हा रुग्णालयात आतापर्यंत ६० वर्षावरील वयोवृद्ध ५० पेक्षा अधिक व्यक्तींनी कोरोनाचे लसीकरण घेतले आहे. तसेच ४५ ते ६० वयोगटातील आजार असलेल्या ज्येष्ठ नागरिकांनाही लसीकरण देण्यात येणार आहे. तसेच ज्यांचे रजिस्ट्रेशन होत नसेल अशा ज्येष्ठ नागरिकांचे रजिस्ट्रेशन नवापूर उपजिल्हा रुग्णालयात करून देण्यात येईल, अशी माहिती नवापूर उपजिल्हा रुग्णालयातील सूत्रांनी दिली.

नवापूर तालुक्यात ३६ रुग्णांवर उपचार

नवापूर तालुक्यात आतापर्यंत ८१७ कोरोना रुग्ण आढळून आले. त्यापैकी ७६२ रुग्ण कोरोना नियंत्रित झाले आहेत. ३६ रुग्णांवर उपचार सुरू असून १९ रुग्णांचा कोरोनात दुर्दैवी मृत्यू झाला आहे. आतापर्यंत नवापूर तालुक्यातून पाच हजार ६६५ व्यक्तींचे स्वॅब घेण्यात आले आहेत.