नंदुरबार : कोरीट येथील महिलेचा झालेला खून पहाता संशयित आरोपी एकटा असे कृत्य करू शकणार नाही. त्यामुळे त्याला आणखी कुणी मदत करणारा आहे किंवा कसे, याचा तपास व्हावा व आरोपीस फाशीची शिक्षा करावी, अशी मागणी आदिवासी टोकरे कोळी व वाल्या सेनेतर्फे पोलीस अधीक्षकांना दिलेल्या निवेदनात केली आहे.
समाज कार्यकर्त्या गीतांजली कोळी यांच्या नेतृत्वाखाली पोलीस अधीक्षकांना निवेदन देण्यात आले. त्यापूर्वी नातेवाइकांची त्यांनी भेट घेऊन सांत्वना केली. निवेदनात म्हटले आहे की, कोरीट येथील उषाबाई कोळी यांची सुजालपूर शिवारातील शेतात अत्यंत निर्घृणपणे हत्या करण्यात आली. महिलेवर झालेले वार आणि हत्येचा प्रकार पहाता एक आरोपी ते करू शकत नाही. त्याचा आणखी कुणी साथीदार आहे का? याचाही तपास करावा. यासाठी आरोपीच्या जबाबावर निर्भर न राहता दुसऱ्या बाजूनेही तपास करणे आवश्यक आहे. संशयित आरोपींना फाशीची शिक्षा व्हावी, यासाठी सबळ पुरावे गोळा करून तातडीने ही केस चालवावी, अशी मागणीही यावेळी करण्यात आली. मयत महिलेच्या कुटुंबीयांना न्याय मिळावा, अशीही मागणी यावेळी करण्यात आली.
गीतांजली कोळी यांच्यासह रवि शिरसाठ, हिरालाल वाकडे, संजय दावळे, दिलीप शिरसाठ, ईश्वर कोळी, सोनू कोळी, भूषण कोळी, अविनाश कोळी आदी उपस्थित होते.